ე.წ. მოსმენების კანონი პარლამენტმა მესამე მოსმენით მიიღო

პოლიტიკა - 13:57, 01 Mar, 2017

996

ე.წ. მოსმენების შესახებ კანონი პარლამენტმა მესამე მოსმენით მიიღო. „საჯარო სამართლის იურიდიული პირის - საქართველოს ოპერატიულ-ტექნიკური სააგენტოს შესახებ“ კანონპროექტთა პაკეტს მხარი 87-მა დეპუტატმა დაუჭირა, ორი კი წინააღმდეგი წავიდა.

კენჭისყრას არ ესწრებოდნენ „პატრიოტთა ალიანსი“ და „ევროპული საქართველო“.

ოპოზიციის განცხადებით აღნიშნული კანონპროეტი ეწინააღმდეგება საკონსტიტუციო სასამართლოს გადაწყვეტილებას და ე.წ მოსმენების გასაღების ისევ სახელმწიფო უსაფრთხოების სამსახურში ტოვებს, რადგან ახალი სააგენტო სწორედ სუს-ს დაექვემდებარება. ოპოზიციის მოსაზრებას იზიარებს არასამთავრობო სექტორიც. იპოზიციის და არასამთავრობო ორგანიზაციების აზრით პრეზიდენტმა აღნიშნულ კანონპროექტს ვეტო უნდა დაადოს.

ე.წ მოსმენების კანონის ხარვეზებზე საუბრობს სახალხო დამცველიც. უჩა ნანუაშვილი არ გამორიცხავს, რომ კანონპროექტი საკონსტიტუციო სასამართლოში კიდევ ერთხელ გასაჩივრდეს.

კრიტიკას არ ეთანხმება მმართველი გუნდი, მათი თქმით აღნიშნული კანონპროექტით მოძებნილი იქნა ოქროს შუალედი, რომელიც უზრუნველყოფს როგორც ქვეყნის უსაფრთხოების დაცვას, ასევე ადამიანის პირადი ცხოვრების ხელშეუხებლობასაც.