ტელეკომპანია რუსთავი 2-ისა და სიტყვის თავისუფლების მხარდასაჭერად გაერთიანებულმა 9 პოლიტიკურმა პარტიამ საგანგებო ბრიფინგი გამართა. საუბარი ეხება რუსთავი 2-ის სასამართლო პროცესს. საბჭოს წევრების განცხადებით, ისინი საქართველოში სიტყვის თავისუფლების დასაცავად პერმანენტულ აქციებს იწყებენ:

„ხვალ უზენაეს სასამართლოში ჩაინიშნა სასამართლო პროცესი რუსთავი 2-ის საქმესთან დაკავშირებით, საზოგადოებისათვის კარგად არის ცნობილი, რომ ამ პროცესს არავითარი კავშირი არ აქვს სამართლებრივ დავასთან. თვეების განმავლობაში, ჩვენ ვიხილეთ შანტაჟის, მუქარის, ადამიანების მოსყიდვის, მოსამართლეების მოსყიდვის უპატიებელი ფაქტები, რომლებიც განხორციელდა ხელისუფლების მხრიდან, ხვალ არის კულმინაცია იმ პროცესის, რომელიც მთელი ამ თვეების განმავლობაში გრძელდებოდა, რაც შეეხება არა რომელიმე ცალკე აღებულ პარტიას, არამედ თავისუფალი სიტყვის ბედს საქართველოში, ამიტომ ჩვენ, პარტიათა საკოორდინაციო ჯგუფის წევრები მოვუწოდებთ ქართულ საზოგადოებას, საქართველოს პოლიტიკურ პარტიებს, ყველა იმ ადამიანს, ვისთვისაც ძვირფასია თავისუფალი სიტყვა ჩვენს ქვეყანაში, მობრძანდნენ 11 საათზე და ერთად გავაპროტესტოთ რუსთავი 2-ის წინააღმდეგ მიმდინარე ვაკჰანალია. საგულისხმოა, რომ რუსთავი 2-ს, რომელიც მხარეა ამ პროცესში, არ უშვებენ სასამართლო დარბაზში და დავა დახურულ რეჟიმში გაიმართება, რადგან რუსთავი 2-ს და ქართულ საზოაგდოებას არ უშვებენ ამ დარბაზში, ამ შენობაში, ჩვენ შენობასთან გავაპროტესტებთ იმ ვითარებას, რომელიც არის ქვეყანაში შექმნილი.

ბიძინა ივანიშვილმა, მას შემდეგ, რაც თავს დაესხა ქართულ ჯარს, ქართულ პოლიციას, ქართულ ეკლესიას ქართულ არასამთავრობო სექტორს, მთლიანად ქართულ საზოგადოებას, ახლა გადაწყვიტა, რომ ჩვენს ქვეყანას წაართვას მთავარი, რაც მას გააჩნია, ეს არის სიტყვის თავისუფლება და ეს არის რუსთავი 2.

დღეს თამამად შეიძლება ითქვას, რომ ქართული საზოგადოების, ქართული დემოკრატიის მომავალი გადის რუსთავი 2-ზე. კიდევ ერთხელ მოგიწოდებთ ყველას, მობრძანდით, რათა დავიცვათ რუსთავი 2. აქცია დაიწყება 11 საათზე, პერმამნეტულ ხასიათს მიიღებს და არ შეწყდება მანამ, სანამ არ იქნება საბოლოო გადაწყვეტილება მიღებული. დარწმუნებული ვარ, რომ ხვალ მიუხედავად პოლიტიკური კუთვნილებისა, ქართული საზოგადოების უდიდესი ნაწილი გამოვა, რათა დაიცვას რუსთავი 2 და სიტყვის თავისუფლება, დემოკრატია ჩვენს ქვეყანაში“, - განაცხადა ნუგზარ წიკლაურმა.

ხვალ 2 მარტს უზენაეს სასამართლოში ჩანიშნულია ტელეკომპანია რუსთავი 2-ის საქმე, მოსამართლეთა კოლეგიამ აღნიშნულ საქმეზე საბოლოო გადაწყვეტილება უნდა გამოიტანოს.