"პოლიტიკური შოუ და შეტევა ქაოსის დანერგვის მიზნით"- ლექვინაძე ოპოზიციის მერიაში არშეშვებაზე საუბრობს

პოლიტიკა - 11:43, 01 Mar, 2017

1089

დედაქალაქის ვიცე-მერი ირაკლი ლექვინაძე აღნიშნავს, რომ ოპოზიციას მერიაში მისვლის შესახებ წინასწარ არ გაუფრთხილებიათ და დარბაზის მოსამზადებლად გარკვეული დრო იყო საჭირო, რამაც შეფერხება გამოიწვია.

ლექვინაძე ოპოზიციას „პოლიტიკურ შოუს“ მოწყობაში ადანაშაულებს და აცხადებს, რომ ამ პროცესს "ნაციონალური მოძრაობა" და მისი მხარდამჭერი ოპოზიციური პარტიები ხელმძღვანელობენ.

„ეს არის შეტევა ქაოსის დანერგვის მიზნით“-თქვა მან.

ირაკლი ლექვინაძე ირწმუნება, რომ მოსამართლე ნატა ნაზღაიძის ოჯახითვის ქონების გადაცემის საკითხზე მერიამ კანონის სრული დაცვით იმოქმედა.

ლექვინაძის თქმით ამ თემაზე ატეხილი აჟიოტაჟი პოლიტიკური სპეკულაციაა.

თბილისის მერის მოადგილე აღნიშნავს, რომ "ნარმანია მივა საკრებულოში, როცა ამას დეპუტატების შესაბამისი რაოდენობა მოითხოვს და დროს განსაზღვრავს თბილისის მერი საკრებულოს უმრავლესობასთან შეთანხმებით".

"ჩვენ ვაპირებთ მივიდეთ საკრებულოში და წარვადგინოთ წლიური ანგარიში. დავით ნარმანია მზად არის ისაუბროს არა მარტო ამ საკითხზე, არამედ ყველა იმ საკითხზე, რომელიც შეიძლება თბილისის წინაშე გამოწვევის სახით იდგეს, თუმცა პოლიტიკურ შოუში, რომელსაც აპირებს ”ნაციონალური მოძრაობა” და მისი მხარდამჭერი ოპოზიციური პარტიები, მერია მონაწილეობას არ მიიღებს. ეს არის დიდი პოლიტიკური შოუს ნაწილი. საქმიან გარემოში ჩვენ მზად ვართ ყველასთან - არასამთავრობო სექტორთან, ოპოზიციურ პარტიებთან, ამ საკითხზე კიდევ ერთხელ ვისაუბროთ და განვმარტოთ ის არგუმენტაცია, რაც ამ საქმეზე არსებობს”, - განაცხადა ლექვინაძემ.

ცნობისთვის, საკრებულოს ოპოზიციამ დღეს თბილისის მთავრობის სხდომაზე დასწრება სცადა, თუმცა მერიის დაცვის სამსახურის თანამშრომლებმა მათ ამის უფლება არ მისცეს.