ნაზღაიძის ოჯახისთვის გადაცემულ ქონებასთან დაკავშირებით საკრებულოს ოპოზიცია სარჩელს ამზადებს

პოლიტიკა - 10:26, 01 Mar, 2017

1388

თბილისის საკრებულოს 7 დეპუტატი სასამართლო სარჩელს ამზადებს და საკრებუულოს მიერ მიღებული გადაწყვეტილების გაუქმებას ითხოვს, რომლის თანახმადაც მოსამართლე ნაზღაიძის ოჯახს მილიონი ლარის ღირებულების ქონება გადაეცა.

ფრაქცია თბილისის თავმჯდომარე მამუკა ახვლედიანი იმედოვნებს სასამართლო გონიერებას გამოიჩენს და გადაწყვეტილებას გააუქმებს:

„ვიმედოვნებთ, რომ სასამართლო მაინც გამოიჩენს გონიერებას, გამოიკვლევს ყველა მტკიცებულებას და აღნიშნული გადაწყვეტილება მაინც გაუქმდება და ეს თბილისის ბიუჯეტიდან ამოღებული მილიონი, მაინც დაუბრუნდება დედაქალაქის ბიუჯეტს,“-განაცხადა, მამუკა ახვლედიანმა.

საკრებულოს ოპოზიცია მათ მიერ შეგროვებული ოფიციალური დოკუმენტაციის საფუძველზე შეეცდება დაამტკიცოს, რომ სტიქიის კომპენსაცია მოსამართლე ნაზღაიძის ოჯახმა იმ ქონებისთვის მიიღო, რომელიც მას აღარ ეკუთვნოდა.

„ცალსახად იკვეთება დანაშაული, კორუფცია, დავარღვევ უდანაშაულობის პრეზუმფციას და ცალსახად იკვეთება ქრთამის გადაცემის ფაქტი. ამასთან დაკავშირებით მერია არის უმოქმედო და იმის გამო, რომ მერია არღვევს როგორც ორგანულ კანონის, საკრებულოს რეგლამენტს, ასევე ევროპული ქარტიის ნორმებს, ჩვენ მოვამზადებთ სარჩელს,“-განაცხადა ფრაქცია ენმ-ს წევრმა მარინა დათუკიშვილმა.