დამწვრობის ცენტრში 13 წლის მოზარდი სუნთქვის აპარატზეა- ექიმბაშის მალამომ მდგომარეობა დაამძიმა

შემთხვევა - 21:50, 28 Feb, 2017

21091

დამწვრობის ცენტრში 13 წლის მოზარდი ხელოვნური სუნთქვის აპარატზეა შეერთებული. ცენტრის ხელმძღვანელის, გუგა ქაშიბაძის ინფორმაციით, მოზარდი კლინიკაში მძიმე მდგომარეობაში მყოფი შეიყვანეს, მას სხეულის 20%-ის დამწვრობა აღენიშნებოდა. მოზარდმა დამწვრობა მდუღარე წყლის გადასხმის შედეგად წელზე, ზურგზე და დუნდულოებზე მიიღო.

როგორც გუგა ქაშიბაძე აღნიშნავს, მდგომარეობის გართულება გამოიწვია იმან, რომ მდუღარე წყლით დამწვარ ბავშვს რამდენიმე დღის განმავლობაში სახლში, ექიმბაშის მიერ დამზადებული მალამოებით მკურნალობდნენ და ექიმს მანამდე არ მიმართეს, სანამ ბავშვი მძიმე მდგომარეობაში არ ჩავარდა.

"ბავშვის მდგომარეობა გართულდა, სუნთქვა გაუჭირდა, გონება დაკარგა, დაებინდა, ამის შემდეგ გამოიძახეს სასწრაფო და ბავშვი გადაყვანილ იქნა მარნეულის კლინიკაში. იქედან სასწრაფო მანქანის დახმარებით მოხვდა ჩვენს კლინიკაში. ამჟამად იგი იმყოფება მართვით სუნთქვაზე, მდგომარეობა საკმაოდ სერიოზულია. ჭრილობები არის დაინფიცირებული, ძალიან ძლიერი ინტოქსიკაციაა, აღენიშნება მეორადი ნეკროზისთვის დამახასიათებელი ნიშნები. ამ სისულელეების გამო შეიძლება ყველაფერი ფატალურად დასრულდეს."- აცხადებს გუგა ქაშიბაძე და ყველას მოუწოდებს ექსპერიმენტებისგან და საეჭვო საშუალებების გამოყენებისგან თავი შეიკავონ და დროულად მიმართონ ექიმს.