"აფხაზეთისა და სამხრეთ ოსეთის მიმართ ჩვენი პოზიცია ურყევია, დაიმახსოვრეთ ერთხელ და სამუდამოდ"- კარასინი

პოლიტიკა - 20:17, 28 Feb, 2017

17694

რუსეთის საგარეო საქმეთა სამინისტრო სპეკულაციას უწოდებს განცხადებას იმის შესახებ, რომ რუსეთმა მომავალში შესაძლოა აფხაზეთისა და სამხრეთ ოსეთის დამოუკიდებლობის აღიარება უკან წაიღოს. განცხადება ამის შესახებ რუსეთის საგარეო საქმეთა მინისტრის მოადგილემ გრიგორი კარასინმა გააკეთა.

კარასინი ამ განცხადებით საქართველოს პრემიერ-მინისტრის სპეციალურ წარმომადგენელს რუსეთთან მოლაპარაკების საკითხებში, ზურაბ აბაშიძეს გამოეხმაურა, რომელმაც განაცხადა რომ რუსეთი ადრე თუ გვიან ამ რეგიონების დამოუკიდებლობის ცნობას უკან წაიღებს.

“ასეთი სპეკულაციები პერიოდულად ჩნდება ხოლმე, რას ეფუძნება ის რთული გასაგებია, როგორც ჩანს საქმე ეხება საკმაოდ მოუქნელ მცდელობებს, რომ ჩვენს მეზობლებს რუსეთისადმი უნდობლობა გაუჩინონ“- განაცხადა კარასინმა ჟურნალისტებთან.

გრიგორი კარასინმა ხაზგასმით აღნიშნა, რომ „აფხაზეთისა და სამხრეთ ოსეთის რესპუბლიკები წარმოადგენენ სუვერენულ დამოუკიდებელ სახელმწიფოებს , რომელთანაც რუსეთის ფედერაციას აქვს კეთილმეზობლური ურთიერთობა, მეგობრობა და მეკავშირეობა.“

„ჩვენი ეს პოზიცია იყო და რჩება ურყევი, დაიმახსოვრეთ ერთხელ და სამუდამოდ“- განაცხადა კარასინმა.