"ერთიანი ძალისხმევით ვიხსნათ ჩვენი ხალხი და ქვეყანა რუსული მმართველობისგან"- ირაკლი ღლონტი

პოლიტიკა - 17:16, 28 Feb, 2017

2136

პოლიტიკური პარტია ,,რეფორმატორების’’ თავმჯდომარე ირაკლი ღლონტი აღნიშნავს, რომ პოლიტიკურ პარტიათა საკოორდინაციო საბჭოს დღევანდელი მანიფესტი არის მიმართვა ადგილობრივი და საერთაშორისო საზოგადოებისადმი, რომელთა მიზანი ქართული დემოკრატიის დაცვაა.

,,მანიფესტი არის ჩვენი წერილობითი მიმართვა ყველა იმ პოლიტიკური თუ საზოგადოებრივი ორგანიზაციის მიმართ, ვისთვისაც მნიშვნელოვანია საქართველომ გააგრძელოს დემოკრატიულ და ცივილიზებულ სამყაროში არსებობა და დაიცვას ყველა ის ინსტიტიტუტი, რომლის გარეშეც არ არსებობს დემოკრატია. ოლიგარქი და მისი მარიონეტული ხელისუფლება აქტიურად ახორციელებს შტურმს მათგან გაუკონტროლებელ და თავისუფალ მედიაზე, ამ გზით კი შეტევას ახორციელებს სიტყვის თავისუფლების წინააღმდეგ და სხვა ინსტიტუტებთან ერთად კორუფციულ ჭაობში ჩათრეული ჰყავს სასამართლო ხელისუფლებაც. საკონსტიტუციო უმრავლესობის მქონე ხელისუფლება ცდილობს ბოლომდე გაანადგუროს პრეზიდენტის ინსტიტუტი და ჩვენს საზოგადოებას წაართვას უფლება აირჩიოს პრეზიდენტი.

მოვუწოდებ ყველა დასავლური ტიპის პოლიტიკურ ორგანიზაციას და საზოგადოებრივ ჯგუფებს, დროებით გადავდოთ ჩვენს შორის არსებული განსხვავებები და ერთიანი ძალისხმევით ვიხსნათ ჩვენი ხალხი და ქვეყანა რუსული, ანტიდემოკრატიული, მაფიოზურ-კლანური მმართველობისგან. ეს არის შანსი, დავადგეთ ილიას და ამბროსი ხელაიას გზას, მართალ და ეროვნულ გზას.’’- განაცხადა ღლონტმა.