"შეშა იყო სისხლიანი, თავთან ეგდო, შეჭმული ჰქონდა სახე "- რას ამბობს ყოფილი რეინჯერი, რომელმაც გარდაცვლილი ნახა

შემთხვევა - 19:00, 27 Feb, 2017

40009

ყოფილი მეტყევე რომელმაც კასპის მუნიციპალიტეტის სოფელ ხოვლეს ტყეში გარდაცვლილი რეინჯერის ცხედარი ერთ-ერთმა პირველმა ნახა, "ნიუპოსტთან" საუბრისას ირწმუნება, რომ ის მოკლულია. ივანე ბითაძის თქმით, შემთხვევის ადგილზე ნანახიდან გამომდინარე ფიქრობს, რომ რეინჯერ კახაბერ ყურაშვილსა და მისთვის უცნობ პიროვნებას შორის ფიზიკურ დაპირისპირებას ჰქონდა ადგილი. რის შემდეგაც 48 წლის რეინჯერი თავის არეში მიყენებული ტრამვის შედეგად გარდაიცვალა. მკვლელობის შემდეგ კი მისი ცხედარი პირუტყვმა დაგლიჯა.

"მეც ყოფლი მეტყევე ვარ, ხმა გამოვიდა კახა დაიკარგაო და ცხენზე დავჯექი და ავედი ტყეში. კარგად ვიცი ეგ ტერიტორია და გავიქეცი, ავედი. მერე კასპის სატყეოს უფროსიც ამოვიდა თავის თანამშრომლებით. გავყევი ცხენის ნავალს და ნივის მარკის მანქანა იყო შესული, ცხენიც იქ იყო შეყოლილი. რომ შევედით იქ პური იყო ნაჭამი და გზიდან ხუთ მეტრში ეგდო მიცვალებული. შეშა იყო სისხლიანი, თავთან ეგდო. შეჭმული ჰქონდა სახე. შეშა მხეცმა დაარტყა? ნაჩხუბარი იყო და კაცი ხუთი მეტრის იქით ეგდო. მერე ჩვენ პოლიციას დავურეკეთ და რომ ამოვიდნენ აღარ მიგვიშვეს"-აცხადებს ივანე ბითაძე.

შეგახსენებთ, შინაგან საქმეთა სამინისტრო საქმეს 116-ე მუხლით იძიებს, რაც სიცოცხლის გაუფრთხილებლობით მოსპობას გულისხმობს. რეინჯერის ცხედარი სოფელ ხოვლეს ტყეში 26 თებერვალს აღმოაჩინეს.