"პატიმარი კი არა, ხელისუფლების ტყვეა"- ოპოზიცია დაკავებულ დეკანოზზე საუბრობს

პოლიტიკა - 10:02, 27 Feb, 2017

5558

ე.წ. ციანიდის საქმე აქტუალობას არ კარგავს. ოპოზიცია პროკურატურას საქმის გამჭვირვალე და ობიექტური გამოძიებისას კვლავ ითხოვს.

ნაციონალურ მოძრაობაში აღნიშნავენ, რომ დაცვისა და ბრალდების მხარეები არათანაბარ პირობებში იმყოფებიან.

ნიკა რურუას განცხადებით, საქმეზე დაკავებული მამა გიორგი მამალაძე "ხელისუფლების ტყვეა".

„პატიმარი კი არა, ტყვე არის ხელისუფლების და ხელისუფლება ეკლესიის საქმეებში ხელებს აფათურებს, რაც სრულიად დაუშვებელია. ამიტომ, საინტერესოა რა აქვს სათქმელი ამ ადამიანს, რატომ არის ის პატიმრობაში რეალურად და საერთოდ რას ემსახურება საერთოდ ეს ნახევრად ფანტასტიკური სიუჟეტი, რომელიც ციანიდის საქმით არის ცნობილი,“ - განაცხადა ნიკა რურუამ.

ფრაქცია მოძრაობა თავისუფლებისთვის - ევროპული საქართველოს თავმჯდომარე გიგი წერეთელი, აღნიშნავს, რომ დაკავებული დეკანოზის მიმართ უდანაშაულობის პრეზუმფციაც დაირღვა.

„უდანაშაულობის პრეზუმფციაც დაირღვა, შეჯიბრებითობის პრინციპიც და აგერ უკვე რამდენი ხანია დაკითხვაზეა საუბარია და ეს დაკითხვაც თითქოს ვერ ხერხდება. ვერც იმ ძალიან სერიოზული აუდიო, ვიდეო თუ სხვა ძალიან სერიოზული მტკიცებულებების გამოქვეყნება, რაზეც პროკურატურა საუბრობს. სიმართლე არის საუკეთესო რეცეპტი, ამიტომ უნდა დაიკითხოს დეკანოზი მამალაძე, რაც შეიძლება სწრაფად,“ - აცხადებს

განსხვავებულია მმართველ გუნდის პოზიცია.

„რამდენადაც ვფლობ ინფორმაციას, მათ შორის დაცვის მხარეს აქვს სრული შესაძლებლობა შეკითხვებზე, თუ პროცედურულად იყოს მონაწილე ამ საკითხში. ბოლო ხანში ვისმენ ძალიან ბევრ სპეკულაციას, რომელიც გულისხმობს და სურვილი არის ყოველ შემთხვევაში, რომ პოლიტიკური შინაარსი მიეცეს ამ საკითხს. მე ვფიქრობ, პოლიტიკოსები უნდა გავჩუმდეთ ამ თემასთან დაკავშირებით და უნდა მიეცეს საშუალება საგამოძიებო ორგანოს ჭეშმარიტება დაადგინოს საქმეზე,“ - განაცხადა ზაზა გაბუნიამ.