რის გადაფარვას ცდილობს ხელისუფლება - ,,შესაძლოა უფრო მზარდი საფრთხე ამოტივტივდეს“

პოლიტიკა - 13:19, 25 Feb, 2017

8328

მოსალოდნელ საგარეო პოლიტიკურ საფრთხეებზე საუბრობს ,,ეროვნულ-დემოკრატიული პარტიის“ ლიდერი. ბაჩუკი ქარდავა ეჭვობს, რომ საპატრიარქოს სკანდალისა და რუსთავი 2-თან დაკავშირებული მოვლენების ფონზე, ხელისუფლების მხრიდან მნიშვნელოვანი ფაქტის გასაიდუმლოებას აქვს ადგილი. ,,შესაძლოა მორიგი საფრთხე ამოტივტივდეს“ -წერს ქარდავა და საქართველოში სომხეთის პრემიერის ვიზიტსა და მის მიერ გაკეთებულ განცხადებებზე ამახვილებს ყურადღებას.

,,ბოლო რამდენიმე დღეა, შინაგან შფოთს ვგრძნობ. ქვეყანაში ერთმანეთის მიყოლებით იმდენი კრიზიული ხასიათის სკანდალები დაგროვდა, რომლებიც ტოვებს განცდას, რომ შესაძლოა კიდევ მორიგი და უფრო მზარდი საფრთხის მატარებელი ამოტივტივდეს, თუ ეს უკვე ასე არ არის... და ამის შესახებ ინფორმაციას მხოლოდ ხელისუფლება ფლობს და ასაიდუმლოებს. ხოლო რიგი პროცესები, ბუნებრივია, არ ვგულისხმობ საქართველოს საპატრიაქოში დატრიალებულ აშკარად ხელისუფლებისგან ინსპირირებულ პროცესებს და არც რუსთავი 2-ის საქმეს, ქმნის ისეთი ფონს, რომ ქვეყანაში რაღაც კონსპირაციულად კეთდება და ხელისუფლება ცდილობს საზოგადოების ყურადღების გაფანტვას.

ძალიან მოკლედ მივყვეთ ლოგიკას: რა შეიძლება იყოს მაგალითად - საგარეო პოლიტიკის მიმართულებით უარესი, ვიდრე გაზპრომი...?

სომხეთის პრემიერი საქართველოში ვიზიტის ფარგლებში ამაყად აცხადებს, რომ ნაპოვნია ლარსის ალტერნატივა, სწორედ ეს განცხადება არის სახიფათო პროცესების დასაწყისის შესავალი. აბაშიძე-კარასინის შეხვედრის ერთ-ერთი თემა რუსეთ-საქართველოს შორის საბაჟო დერეფნების ამოქმედებას ითვალისწინებდა, ხოლო სომხეთის პრემიერმა ხაზგასმით აღნიშნა, რომ განჩდება ლარსის ალეტრნტივა, დანარჩენზე ჯერ ფრჩხილები არ გაიხსნება და აგრეთვე მოვილაპარაკებთ ენერგეტიკულ დერეფნებზეო...

საგარეო პოლიტიკის ჭრილში სამეზობლო პოლიტიკა რუსული ფაქტორის გათვალისწინებით ცოტა რთული წინადადებაა არა? მაგრამ ზუსტად ისეთივე როგორი სირთულისა და პრობლემის მატარებელიც შეიძლება იყოს რუსული ფაქტორის გაძლიერება კავკასიაშია საქართველოს ინტერსების დაკნინების ხარჯზე!“ - წერს ედპ-ს ლიდერი, მოძრაობა ,,ახალი ერთობა საქართველოსთვის“ წევრი.