"პოლიტიკურ შოუში მონაწილეობის მიღებას არ ვაპირებ"

"პოლიტიკურ შოუში მონაწილეობის მიღებას არ ვაპირებ" - ნარმანია საკრებულოში არ მიდის

პოლიტიკა - 11:49, 24 Feb, 2017

2023

თბილისის მერი დავით ნარმანია საკრებულოში მისვლას არ აპირებს.
”ეს იქნება პოლიტიკური შოუ და მას რეალობასთან რაიმე სახის შეხება არ აქვს, მითუმეტეს, რომ ჩვენ ტერიტორიის გადაცემა კანონმდებლობის და პროცედურების სრული დაცვით გავაკეთეთ. არ ვაპირებ დღეს დედაქალაქის საკრებულოში მისვლას და არც თბილისის მერიის წარმომადგენლები დაესწრებიან სხდომას...საზოგადოებამ ძალიან კარგად იცის, რომ მე, როგორც დედაქალაქის მერს საკრებულოში ანგარიშის წარდგენის პრობლემა არასდროს არ მაქვს, მათ შორის გასულ წელს ორჯერ რიგგარეშედაც ვიმყოფებოდი საკრებულოში, თუმცა გამომდინარე იქიდან, რომ დღეს იგეგმება პოლიტიკური შოუს მოწყობა, მე ამ შოუში მონაწილეობის მიღებას არ ვაპირებ. ეს არის აბსოლუტურად თითიდან გამოწოვილი საკითხი, რომლის პედალირებასაც სპეციალურად ახდენენ ჩვენი პოლიტიკური ოპონენტები”- განაცხადა დავით ნარმანიამ.

საკრებულოს ოპოზიცია დღეს, 16:00 საათზე დანიშნულ სხდომაზე დავით ნარმანიას მისვლას და მოსამართლე ნატა ნაზღაიძის ოჯახისთვის მილიონიანი ქონების გადაცემის საკითხზე მათთვის ახსნა-განმარტების მიცემას ითხოვს.

მოსამართლე ნატა ნაზღაიძისთვის გადაცემულ თანხასთან დაკავშირებით, ოპოზიცია საკრებულოში თბილისის მერის მისვლას ითხოვს.

მათი თქმით, იმ შემთხვევაში, თუ მერი დავით ნარმანია 7 დღის განმავლობაში საკრებულოში არ გამოცხადდება და დასმულ შეკითხვებს არ უპასუხებს, მისი პასუხისმგებლობის საკითხი დადგება.

ოპოზიცია ასევე 2016 წლის 26 დეკემბრის განკარგულების გაუქმებას ითხოვს, რომლის საფუძველზეც მოსამართლის ძმას ზვიად ნაზღაიძეს 5 000 კვადრატული მიწა გადაეცა.