დეკანოზის ადვოკატებმა პროკურატურას ჩვენების მიცემასთან დაკავშირებით შუამდგომლობით მიმართეს

პოლიტიკა - 15:37, 23 Feb, 2017

2797

მკვლელობის მომზადების ბრალდებით დაკავებული დეკანოზის, მამა გიორგი მამალაძის ადვოკატებმა პროკურატურას ჩვენების მიცემასთან დაკავშირებით შესაბამისი შუამდგომლობით მიმართეს.

გიორგი ფანცულაიას განცხადებით, მამა გიორგი მამალაძე დაარღვევს დუმილის უფლებას, ისაუბრებს ძალიან ბევრ საკითხზე, მათ შორის საკუთარ უდანაშაულობაზე. „იმედი მაქვს, რომ დაგვიკავშირდებიან უახლოეს პერიოდში მთავარი პროკურატურის საგამოძიებო ორგანოს თანამშრომლები. განცხადებაში მითითებული გვაქვს, რომ დაკითხვის დროზე მოხდეს შეთანხმება ორმხრივად, ტექნიკური ხარვეზი რომ არ იყოს დროის მხრივ. ჩვენ მზადყოფნას გამოვთქვამთ უახლოეს პერიოდში, მათ შორის შეიძლება ხვალაც, დაიკითხოს მამა გიორგი მამალაძე, მისცეს მან სრული ჩვენება, დაარღვიოს დუმილის უფლება, ისაუბროს ძალიან ბევრ რამეზე და მათ შორის საკუთარ უდანაშაულობაზე. ბრალდებებში, მათ შორის იარაღთან დაკავშირებით ბრალდებაშიც, ის არის სრულად უდანაშაულო. ამას ვამბობ პირდაპირ და ამ საკითხზეც მათ შორის იქნება ჩვენებაში დაფიქსირებული თუ საიდან, როგორ და რა ვითარებაში მოხდა ეს ყველაფერი,“-განაცხადა გიორგი ფანცულაიამ.

როგორც მანამდე გიორგი ფანცულაიამ განაცხადა, პროკურატურას მამაგიორგი მამალაძის დაკითხვის საშუალება აქამდეც ქონდა , თუმცა უწყებამ ეს არ გააკეთა.