კონგოში დატყვევებული ქართველი მფრინავი სოსო ოსურაული საქართველოს შეიარაღებულ ძალებში მსახურობდა, თუმცა იგი თავდაცვის უწყებიდან საკუთარი განცხადების საფუძველზე ორჯერ იქნა დათხოვილი.

ოსურაულმა კერძო კომპანიაში მუშაობის გადაწყვეტილება დაახლოებით 10 წლის წინ მიიღო პირველად, თუმცა 2014 წელს კვლავ დაბრუნდა საქართველოში და განაგრძო მუშაობა თავდაცვის უწყებაში.

როგორც „ნიუპოსტს“ საქართველოს თავდაცვის სამინისტროში განუცხადეს, 2015 წლის 21 მარტს ოსურაულმა კვლავ დატოვა შეიარაღებული ძალები და კონგოში წავიდა. აღსანიშნავია რომ ოსურაულის ძმა დღემდე საქართველოს ჯარში მსახურობს:

„სოსო ოსურაული მსახურობდა საქართველოს შეიარაღებულ ძალებში 2015 წლის წლის 21 მარტს საკუთარი განცხადების საფუძველზე დატოვა შეიარაღებული ძალები და წავიდა კერძო კომპანიაში სამუშაოდ უცხოეთში.

მისი მხრიდან შეიარაღებული ძალების დატოვების პირველი პრეცენდენტი არ ყოფილა და მანამდეც წლების წინ იყო ასევე საკუთარი ნებით დათხოვილი შეიარაღებული ძალებიდან, ასევე კონგოში იყო წასული კერძო საავიაციო კომპანიაში სამუშაოდ, დაბრუნდა 2014 წელს საქართველოში, მივიდა შეიარაღებულ ძალებში, მაგრამ 2015 წლის მარტში ისევ წავიდა.

მისი ძმა მსახურობს ჩვენთან.

თავდაცვის სამინისტრო საგარეო საქმეთა სამინისტროსთან კოორდინაციაში კონტაქტზეა ოჯახთან და აკეთებს ყველაფერს შესაძლებლობების ფარგლებში, რომ ოჯახსა და თადარიგის ოფიცერსაც აღმოუჩინოს დახმარება თუ ეს შესაძლებელი იქნება, იგი არის მეამბოხეების ხელში, რაც ართულებს ზოგადად სიტუაციას“, - აცხადებენ „ნიუპოსტთან“ საუბრისას თავდაცვის უწყებაში.