"შოთაძის თანამდებობიდან გადადგომის საკითხს მე კი არა, თქვენ უნდა სვამდეთ"- კახიძე "ოცნებას"

პოლიტიკა - 14:36, 22 Feb, 2017

1565

პარლამენტის პლენარულ სხდომაზე უმცირესობის წევრმა ოთარ კახიძემ მთავარი პროკურორის გადადგომის აუცილებლობაზე კიდევ ერთხელ ისაუბრა.
დეპუტატმა ”ქართულ ოცნებას” მიმართა: "მთავარი პროკურორის ირაკლი შოთაძის თანამდებობიდან გადადგომის საკითხს მე კი არა, თქვენ უნდა სვამდეთ და კითხვები, რომელიც საზოგადოებას გააჩნია, თქვენ უნდა გააჟღეროთ".
"ევროპული საქართველოს" ერთ-ერთი ლიდერი, მიიჩნევს, რომ ე.წ ციანიდის საქმეზე საგანგებო პროკურორი უნდა დაინიშნოს.

”მთავარმა პროკურორმა 13 თებერვალს გამართულ ბრიფინგზე განაცხადა, რომ იგეგმებოდა და მზადდებოდა მაღალი სასულიერო იერარქის მკვლელობა. მანვე ისაუბრა, რომ დაკავებულია დეკანოზი გიორგი მამალაძე, რომელიც გერმანიაში მიემგზავრებოდა და რომლის ბარგში კალიუმის ციანიდი აღმოუჩენიათ. მთავარმა პროკურორმა მოგვახსენა, რომ დეკანოზის სახლიდან ამოღებულია ცეცხლსასროლი იარაღი, ექვსი ვაზნა, ასევე დაკითხულია პატრიარქის დაცვის უფროსი, ჰქონდა თუ არა აღნიშნულ პიროვნებას პატრიარქთან წვდომა. პრაქტიკულად, მთავარმა პროკურორმა, გარდა იმისა, რომ მაღალი იერარქის სასულიერო პირზე ისაუბრა, მიანიშნა, რომ ეს პატრიარქს ეხებოდა. ამდაგვარადვე გამოეხმაურნენ მას ხელისუფლების უმაღლესი თანამდებობის პირები, რომელთა გამოსვლებში პირდაპირ იყო საუბარი, რომ საფრთხე პატრიარქის სიცოცხლეს შეექმნა, რაც პროკურატურამ გმირულად აღკვეთა. რამდენიმე დღეში დადასტურდა, რომ ირაკლი შოთაძემ ბრიფინგით შეცდომაში შეიყვანა საზოგადოება და ხელი შეუწყო პიარკამპანიას, რომ თითქოს დეკანოზი გიორგი მამალაძე პატრიარქის მკვლელობას გეგმავდა”, - განაცხადა კახიძემ პარლამენტის სხდომაზე.