გორში საკრებულოს და მერიის თანამშრომლებს შენობა თავზე ენგრევათ

პოლიტიკა - 13:48, 22 Feb, 2017

2810

ქალაქ გორის ცენტრში, გასული საუკუნის 50-იან წლებში აგებული ადმინისტრაციული შენობის დანგრევის საფრთხეზე, გორის საკრებულოს წევრები ალაპარაკდნენ. ,,ნიუპოსტის“ კორესპონდენტის ცნობით, ისინი შენობის ავარიულობაზე საუბრობენ და შესაძლო უბედური შემთხვევის საფრთხეზე ამახვილებენ ყურადღებას. „შენობა არის საშინლად ავარიული, შეიძლება კატასტროფამდეც მიგვიყვანოს და რაღაც გამოუსწორებელ შედეგებამდე მივიდეთ“-აცხადებს თამარ თედლიაშვილი, რომელიც ადმინისტრაციულ შენობაში არსებულ სხვა პრობლემებზეც საუბრობს. მისი თქმით, სამუშაო ოთახები მოუწესრიგებელია და არ არის სათანადო ინვენტარი. მის მსგავსად გაუსაძლის სამუშაო გარემოზე ჩივიან საკრებულოს სხვა წევრებიც. „ხანდახან აქ გაჭირვებული ადამიანები მოდიან, მაგრამ შეიძლება ისეთ პირობებში მიიღო, რომ იფიქროს, ამან მე რა უნდა მიშველოს თავის თავისთვის ვერ უშველიაო.“-ამბობს, ივანე ჩხიკვაძე. „როგორც გარეთ ცივა, ისე შიგნით ცივა, მარა ეხლა გამათბობელი მომიტანეს, თუმცა მაქვს სულ ორი სკამი. ვიღაც, რომ მოვიდეს, ერთი ოთხი ამომრჩეველი ერთად ვერ დავსვავ“-აცხადებს ზაზა მეზვრიშვილი.
შენობის დანგრევის საფრთხეს ვერ ხედავენ ქალქის მერიაში და ამბობენ, რომ მხოლოდ იმ კაბინეტებს ჩაუტარდება რეაბილიტაცია რომელშიც გასულ წელს უამინდობისას ჭერი ჩამოიშალა. რაც შეეხება ინვენტარს, აცხადებენ რომ ადგილობრივ ბიუჯეტში შესაბამისი თანხები არ არის.
აღსანიშნავია, რომ ადმინისტრაციულ შენობას აგების შემდეგ სრული სარეაბილიტაციო სამუშაოები არ ჩატარებია. მოშლილია გათბობის და ელექტრო გაყვანილობის სისტემა. დაზიანებულია არის თითქმის ყველა კაბინეტის ჭერი და იატაკი. უამინდობისას, ზოგიერთ ოთახში წვიმაც ჩადის. ბოლო დროს იშლება შენობის გარე ფასადიც. თუმცა ადგილობრივ ბიუჯეტს, რომ ისტორიული ნაგებობის სრული რეაბილიტაციისთვის საჭირო ტანხების დაფინანსება არ შეუძლია ეს საკრებულოს წევრებმაც იციან და დახმარებას ცენტრალურ ხელისუფლებას სთხოვენ. შენობაში ასზე მეტი საჯარო მოხელე მუშაობს.