საკრებულოს ოპოზიცია დედაქალაქის მერის წინააღმდეგ - დეპუტატები ნარმანიას მისვლას ითხოვენ

პოლიტიკა - 13:33, 22 Feb, 2017

1288

თბილისის მუნიციპალიტეტის საკრებულოს ფრაქციების : ,,ერთიანი ნაციონალური მოძრაობა“, ,,მოძრაობა თავისუფლებისთვის“, ,,რესპუბლიკელები“, ,,დედაქალაქი“, ,,ეროვნული ფორუმი“ წევრებმა, ასევე დამოუკიდებელმა დეპუტატებმა - ალექსანდრე ელისაშვილმა და სევდია უგრეხელიძემ ერთობლივი ბრიფინგი გამართეს.
როგორც დეპუტატებმა აღნიშნეს, ხელმოწერების ის რაოდენობა, რაც დედაქალაქის მერს უახლოეს სხდომაზე მისვლას ავალდებულებს, უკვე შეგროვებულია. ოპოზიციური ფრაქციების წარმომადგენლების განცხადებით, საკრებულოს რიგგარეშე სხდომის ჩანიშვნა, სადაც ქალაქის მერი "რუსთავი2"-ის საქმის მოსამართლის ძმის, ზვიად ნაზღაიძისთვის თბილისის ბიუჯეტიდან გადაცემული მილიონიანი ქონების შესახებ არსებულ კითხვებს დეტალურად უპასუხებს, აუცილებლად უნდა მოხდეს.
მათივე თქმით, სხდომაზე ასევე დადგება საკითხები 2016 წლის 23 დეკემბრის დადგენილების ბათილად ცნობისა და 13-14 ივნისის სტიქიით მიყენებული ზიანის ანაზღაურების წესში ცვლილებების შეტანის თაობაზეც.დავით ნარმანიას მისვლის აუცილებლობა საკრებულოში მას შემდეგ დადგა, რაც გუშინ ოპოზიციის მიერ ორგანიზებული შეხვედრა იმ მიზეზით ჩაიშალა, რომ იქ მერიის ორი მოადგილე და ქონების მართვის სააგენტოს ხელმძღვანელი არ გამოცხადდნენ. თბილისის მერის განმარტებას კი რომლის მიხედვითაც მან არ გაუშვა თანამშრომლები სხდომაზე ოპოზიცია "უპასუხისმგებლოს" უწოდებს.

თბილისის საკრებულოს დამოუკიდებელი დეპუტატის ალეკო ელისაშვილის თქმით საქმე ეხება ძალიან მძიმე კორუფციულ სკანდალს:„ჩვენ არ ვთამაშობთ სახლობანას. საერთოდ არ მაქვს ნარმანიასთან სათამაშოდ საქმე. ძალიან მძიმე კორუფციულ სკანდალზე ვლაპარაკობთ. იმაზე, რომ ჯიბეში ჩაუდეს მოსამართლეს მილიონიანი ქონება. ამაზეა პასუხი გასაცემი,“-აცხადებს ალეკო ელისაშვილი.დავით ნარმანიას ვახტანგ გომელაურის ხელის ბიჭს უწოდებს საკრებულოს წევრი თემურ გრიგალაშვილი:„ნარმანიას მერობა არის უნიჭო რეჟისორის მიერ დადგმული შოუ და მას აუცილებლად მოუწევს პასუხის გაცემა და ხალხი დაინახავს, რომ რეალურად ის არ არის ქალაქის მერი და ის არის ვახტანგ გომელაურის ხელის ბიჭი,“-განაცხადა თბილისის საკრებულოს ფრაქცია ერთიანი ნაციონალური მოძრაობის წევრმა თემურ გრიგალაშვილმა.
დედაქალაქის მერის დაბარების მოთხოვნას უერთდება რესპუბლიკური პარტიაც და აცხადებენ, რომ დავით ნარმანია პოლიტიკურ შოუს აწყობს:„პოლიტიკურ შოუს აწყობს თავად, როდესაც ასეთი უპასუხისმგებლო განცხადებებით, მთელს საქართველოს უცხადებს, რომ თურმე თანამშრომლები არ გამოუშვა. ის არ არის საბავშვო ბაღის დირექტორი, რომელიც წყვეტს ბავშვები გაუშვას თუ არა სასეირნოდ ეზოში,“-აცხადებს ფრაქცია რესპუბლიკელების თავმჯდომარე ხათუნა სამნიძე.