"პოლიტიკოსები პროკურორის, პროკურორები კი პოლიტიკოსების როლს თამაშობდნენ"- პრეზიდენტი ციანიდის საქმეზე

პოლიტიკა - 22:06, 21 Feb, 2017

1932

საქართველოს პრეზიდენტი გიორგი მარგველაშვილი ე.წ ციანიდის საქმეზე პოლიტიკოსების მიერ გაკეთებულ განცხადებებს აფასებს.
ქვეყნის პირველი პირის თქმით, საქმის ირგვლივ "როლებისა და ფუნქციების აღრევა მოხდა".

"შეუძლებელია შეცდომა არ დაგემართოს, როცა ხდება როლებისა და ფუნქციების აღრევა. ამ დღეების განმავლობაში ვხედავდით, რომ პოლიტიკოსები პროკურორის როლს თამაშობდნენ, პროკურორები კი პოლიტიკოსების როლს. თვისობრივად აღრეული იყო ის, ვინ რა კომპეტენციაში უნდა ისაუბროს ამ ქვეყანაში. სანამ პროკურორის განცხადება იყო მთელმა რიგმა პოლიტიკოსებმა გააკეთეს განცხადებები. ასეთ ვითარებაში ძალიან მარტივი წესები არსებობს, რომელიც გამოგონილია იმისთვის, რომ სისტემამ იფუნქციონიროს. როცა შენ ხარ პოლიტიკოსი, შენ არ ხარ პროკურორი, შეიძლება ძალიან გინდა გახდე პროკურორი, მაგრამ არ ხარ პროკურორი და შენ უნდა აკეთებდე პოლიტიკურ განცხადებებს. ხოლო როცა შენ ხარ პროკურორი, შეიძლება გინდოდეს პოლიტიკოსობა, მაგრამ უნდა აკეთებდე ისეთ განცხადებებს, რომელიც პროკურატურის ფუნქციებშია. დღესაც ვხედავთ, რომ არაერთი ადამიანი, რომელსაც არანაირი კომპეტენცია არ გააჩნია ამ საქმეებზე სასაუბროდ აკეთებს განცხადებებს, რომელიც ძაბავს საზოგადოებას. ყოველ ასეთ განცხადებას კითხვის ნიშნები მოჰყვება"- თქვა მარგველაშვილმა "არჩევანში".

მისი თქმით, შეილახა უდანაშაულობის პრეზუმფცია. საქართველოს პრეზიდენტმა განაცხადა, რომ საქმის გამოძიებაში ორივე მხარე თანაბრად უნდა იყოს ჩართული.

„მის ადვოკატებს უნდა ჰქონდეთ შესაძლებლობა, ნათლად ჩაგვაყენონ ყველა საქმის კურსში და ჩვენ არ ვიყოთ ფარულად გავრცელებული, ვიღაცისთვის ნაჩვენები რაღაცა ამბების მნახველების ინფორმაციაზე დაყრდნობილნი,“ - განაცხადა გიორგი მარგველაშვილმა.