"ეს განცხადება იყო პოლიტიკური ხასიათის" - ბექა ძამაშვილი ლავროვის განცხადებას აფასებს

პოლიტიკა - 18:58, 21 Feb, 2017

2394

იუსტიციის სამინისტროს საერთაშორისო სასამართლოებში სახელმწიფო წარმომადგენლობის დეპარტამენტის უფროსი, ბექა ძამაშვილი რუსეთის საგარეო საქმეთა მინისტრის სერგეი ლავროვის განცხადებას გამოეხმაურა.

ბექა ძამაშვილმა აღნიშნა, რომ ლავროვის განცხადება პოლიტიკური ხასიათის იყო. თუმცა, მისი თქმით, სამართლებრივად მისი განცხადება დიდწილად არაფერს ცვლის.

„რა თქმა უნდა, ეს განცხადება იყო პოლიტიკური ხასიათის. სამართლებრივი თვალსაზრისით დიდწილად არაფერს ცვლის,“ - განაცხადა ბექა ძამაშვილმა.

იუსტიციის სამინისტროს საერთაშორისო სასამართლოებში სახელმწიფო წარმომადგენლობის დეპარტამენტის უფროსი ჰააგის სასამართლოში საქართველო-რუსეთის 2008 წლის ომის გარემოებების გამოძიების საკითხსაც შეეხო.

„ჩვენ ვფიქრობთ, რომ ეს გამოძიება არის აგრეთვე ძალიან მნიშვნელოვანი იმისთვის, რომ სახელმწიფოებრივად მნიშვნელოვანი საკითხები იქნას საერთაშორისო დონეზე სამართლებრივად გამყარებული ეს არის საკმაოდ ხანგრძლივი პროცესი, თუმცა თითოეულ ეტაპს აქვს ძალიან დიდი მნიშვნელობა და ჩვენ წინასწარი მოკვლებიდან დაწყებული უკვე უშუალოდ ამ გამოძიების ფარგლებში ძალიან აქტიურად ვართ კონტაქტზე და ვთანამშრომლობთ სისხლის სამართლის საერთაშორისო სასამართლოსთან, რომ ჩვენი ინტერესი მაქსიმალურად იქნეს გათვალისწინებული,“ - განაცხადა ბექა ძამაშვილმა.

რუსეთის საგარეო საქმეთა მინისტრმა მიუნხენის უსაფრთხოების კონფერენციაზე 2008 წლის აგვისტოს ომში საქართველოს კიდევ ერთხელ დაადანაშაულა ლავროვმა ჩვენი ქვეყანა ნარკოტრანზიტისა და ექსტრემისტების მფარველობაშიც დაადანაშაულა. რუსეთის საგარეო საქმეთა მინისტრმა საქართველოს სავიზო რეჟიმის გაუქმებაზეც ისაუბრა.