"დაბეჟილი და სასტიკად ნაცემია"- "ეროვნული ფორუმის" წევრის შვილი პოლიციის უფროსმა სცემა?

შემთხვევა - 09:51, 21 Feb, 2017

5371

"ეროვნული ფორუმის" წევრი ავთო დავითაძე აცხადებს, რომ გვიან ღამით მისი შვილი გიორგი დავითაძე ვაკე-საბურთალოს პოლიციის უფროსმა სცემა.

დავითაძის ინფორმაციით, მისი შვილი ვაკე-საბურთალოს პოლიციაში მივიდა, რადგან მისი მეგობრები იქ ყავდათ გადაყვანილი.

"ეროვნული ფორუმის" წევრის განცხადებით, პოლიციის უფროსმა გიორგი გალდავამ, გიორგი დავითაძე თავად შეიყვანა პოლიციის შენობაში, საიდანაც ის ნაცემი გამოვიდა.

„მოსულა ვაკე საბურთალოს სამმართველოს უფროსი გალდავა, დაუნახავს, რომ ჩემი შვილი იქ არის. გადაუხვევია ხელი, აუყვანია კაბინეტში, ამის მხილველები არიან იქ ძალიან ბევრი ადამიანი, ვინც იდგა, ახლობლები და გულშემატკივრები ჩემი შვილის მეგობრის და დიდხანს რომ არ ჩამოვიდა იქიდან, ბიჭებმა მიმართეს ზომებს და გამოიძახეს სასწრაფოდ ადვოკატი. მოვიდა ადვოკატი და ამ დროს გამოდის ჩემი შვილი ნაცემი, დაბეჟილი, სასტიკად უცემია, პირადად პოლიციის უფროსს გალდავას და რამდენიმე თანამშრომელი ყოფილან იქ,“ - აცხადებს ავთანდილ დავითაძე.

ახალგაზრდა მამაკაცი "ელიზაბეტ ბლექველის ჰოსპიტალში" იმყოფება. მედიკოსებს მისი ჯანმრთელობის შესახებ კომენტარი არ გაუკეთებით.

"ნიუპოსტი" შინაგან საქმეთა სამიანისტროს დაუკავშირდა, უწყების კომენტარს უახლოეს პერიოდში შემოგთავაზებთ.