„ლენინი შეიძლება ისევ პრეზიდენტი გახდეს! ოღონდ ამ შემთხვევაში ეს მემარცხენე კანდიდატი ლენინ მორენო იქნება ეკვადორში. პირველ ტურში მოიგო, მეორე ტური დაძაბული იქნება.“ - წერს დიპლომატი მამუკა კუდავა. მას ეკვადორის საპრეზიდენტო არჩევნები და ლენინ მორენოს ლიდერობა ერთ ისტორიას ახსენებს.

მამუკა კუდავა: „

ერთხელ საფრანგეთში ჩემთან ერთად სწავლობდა ეკვადორელი, სახელად ლენინი. რა დააშავე ამისთანა-მეთქი და - ბაბუაჩემი იყო მარქსისტი კომუნისტი და დამარქვაო. მეტიც, ჩემს ბიძაშვილს სტალინი შეარქვაო.

ლენინ მორენოსაც არ აქვს ცოდვა ჩადენილი, მაგრამ პედაგოგმა მამამისმა მისი კუმირის ვლადიმირ ილიჩის გვარი უბოძა. ისე არ იქნება ცუდი, რომ ჩვენში საბჭოთა კავშირის და სტალინის მეხოტბეებმა საქმით დაადასტურონ ბელადების ერთგულება და ოჯახებში ბევრი ლენინი, სტალინი და ლესტანბერი გაჩნდეს.

ეკვადორი საქართველოსთვის განსაკუთრებით აქტუალურია არაღიარების პოლიტიკის ფარგლებში. როცა ვენესუელამ და ნიკარაგუამ აღიარა აგხაზეთ-ცხინვალი დამოუკიდებელ სახელმწიფოებად, გაჩნდა საშიშროება ლათინური ამერიკის სხვა მემარცხენე მთავრობების მხრიდანაც. მას შემდეგ ქართულმა დიპლომატიამ დასავლელი პარტნიორების დახმარებით ეს საფრთხე თავიდან აიცილა - ორმხრივი ურთიერთობების დამყარებით და კონკრეტული პროექტების განხორციელებით. იმედია, გამარჯვების შემთხვევაში ამხანაგი ლენინი მისი წინამორბედის კორეას პოლიტიკას არ გადაუხვევს.“