რატომ გაუფორმდა ეკა ბესელიას თანხმობით პირადი ცხოვრების ამსახველი მასალის გამავრცელებლებს საპროცესო შეთანხმება?

პოლიტიკა - 14:01, 20 Feb, 2017

9812

"ქრონიკა +"- ის მთავარი რედაქტორი ელისო კილაძე პირადი ცხოვრების ამსახველი ფირების საქმესთან დაკავშირებით სკანდალურ ინფორმაციას ავრცელებს.

როგორც "ნიუპოსტს" ჟურნალისტმა განუცხადა "ქრონიკა+"-ს ჩაუვარდა დოკუმენტი, საიდანაც ირკვევა, რომ გასული წლის 15 ივნისს, ქ.თბილისის პროკურატურაში შედგა საპროცესო შეთანხმების შესახებ დაზარალებულთან კონსულტაციის ოქმი.

კილაძის განცხადებით, დოკუმენტიდან ირკვევა, რომ პარლამენტის იურიდიულ საკითხთა კომიტეტის თავმჯდომარე ეკა ბესელია ჰუმანურობის პრინციპიდან გამომდინარე საქმეზე ბრალდებულებს მიმართ საპროცესო შეთანხმების გაფორმებას დათანხმდა.

"2016 წლის 15 ივნისს, ქალაქ თბილისის პროკურატურაში შედგა საპროცესო შეთანხმების შესახებ დაზარალებულთან კონსულტაციის ოქმი, ოქმის შემდგენი პირია პროკურორი ლაშა კოტრიკაძე, მონაწილე პირი გახლავთ ქალბატონი ეკა ბესელია. ბესელია ამბობს, რომ ვინაიდან ბრალდებულები აღიარებენ ბრალდებას და ამავდროულად ის თანამდებობრივად წარმოადგენს საქართველოს პარლამენტის ადამიანის უფლებათა დაცვის კომიტეტის თავმჯდომარეს, ჰუმანურობის პრინციპიდან გამომდინარე, თანახმაა ბრალდებულებს გაუფორმდეს საპროცესო შეთანხმება.

მე მაქვს ლოგიკური კითხვა, მაშინ როცა საზოგადოება ცხოვრობდა მორალურ და ფსიქოლოგიურ ტერორში - პოლიტიკოსებს, ჟურნალისტებს და აქტიურ პირებს ემუქრებოდნენ პირადი ცხოვრების ამსახველი ფირებით და ამ მომენტისთვის ეს ფირები უკვე გამოქვეყნებული იყო, მაშინ როცა გელა ღურწკაიამ ჩემთან მოიტანა დეპუტატის პირადი ცხოვრების ამსახველი ფირი, ის იყო პირი რომელიც გეგმავდა და მონაწილეობდა ჩემი დაკავების სპეცოპერაციაში, თუ ამ ფირს მე დავიტოვებდი, სრულად ვნახავდი ან გავასაჯაროებდი. ვინ მისცა ეკა ბესელიას გამოიჩინოს ჰუმანურობა ასეთი ადამიანების მიმართ და დაეთანხმოს მათ მიმართ საპროცესო შეთანხმების გაფორმებას და არ მოითხოვოს ამ ადამიანების უმკაცრესად დასჯა.

ნიშნავს თუ არა ეს იმას, რომ პირადი ცხოვრების ამსახველი ფირების კვალი პირდაპირ ხელისუფლებისკენ მიდის, და ხელისუფლებას შეეშინდა გელა ღურწკაიას ალაპარაკების, რომ მას დამკვეთები და იმ პირთა ვინაობა დაესახელებინა, ვისთან ერთადაც დაიგეგმა ძალიან დიდი დანაშაული "ქრონიკა+"-ის და მისი მთავარი რედაქტორის მისამართით. ეს არ არის ბოლო სკანდალი ამ საქმეზე, თქვენ გაიგებთ სხვა პირების ვინაობას, ვინ იყვნენ ჩართულები ამ ბინძურ პროვოკაციებში, პირდაპირ გეტყვით, რომ საქმე არის შეკერილი ქალაქ თბილისის პროკურატურაში, სხვა დეტალებს დღის განმავლობაში გაიგებთ" - აღნიშნა "ნიუპოსტთან" ელისო კილაძემ.