"50 თეთრით გაძვირებული საწვავი“- ენმ მთავრობის არასწორ პოლიტიკაზე საუბრობს და აქციზის სასწრაფოდ გაიაფებას ითხოვს

პოლიტიკა - 12:58, 20 Feb, 2017

1781

"ერთიანი ნაციონალური მოძრაობის" წარმომადგენელმა ზურაბ მელიქიშვილმა დღეს გამართულ ბრიფინგზე საწვავის გაძვირების ტენდენციაზე ისაუბრა. მისი თქმით, მაშინ როცა, მოქმედი ხელისუფლების ერთ-ერთი მთავარი დაპირება საწვავის გაიაფება იყო, ბოლო პერიოდში მათ პირობებში, საწვავი 50 თეთრით გაძვირდა.

მელიქიშვილის განცხადებით, საწვავზე ფასის ზრდა პირდაპირ იწვევს, სამომხმარებლო პროდუქტებისა და სხვადასხვა სახის მომსახურეობების გაძვირებას, რაც მოსახლეობას მძიმე ტვირთად აწვება.

"საწვავის გაიაფების დაპირებით მოსული ხელისუფლების პირობებში, თითქმის ყოველდღიურად იზრდება მისი ფასი, რაზეც ლარის გაუფასურებამ და აქციზზე ფასის მატებამ იმოქმედა. თუმცა, ჩინოვნიკებმა არც კი იციან საწვავზე ფასის ზრდის შესახებ, რადგან მათ ავზებს ჩვენი ჯიბიდან გადახდილი თანხით ვუვსებთ.

სასწრაფოდ უნდა შემცირდეს აქცისზე ფასი, ასევე უნდა შემცირდეს ბიუჯეტის ხარჯვითი ნაწილი და მნიშვნელოვანია შეთანხმებულ ფასთან დაკავშირებით ყველა ეჭვი გამოირიცხოს. გაძვირების მესამე ეტაპზე, საერთაშორისო ფასი საერთოდ არ გაზრდილა. რას აკეთებს ამ შემთხვევაში კონკურენციის სააგენტო და ბატონი ხადური, რომელმაც თავი დაგვამახსოვრა თავისი "წარმატებული მუშაობით" ფინანსთა სამინისტროში ამ ეჭვის გასაქარწყლებლად?! არაფერს”- განაცხადა მელიქიშვილმა.