"ამოღებული ციანიდი საკმარისი იქნებოდა რამდენიმე ადამიანის მოსაკლავად"- პროკურორის მოადგილე სკანდალური საქმის დეტალებზე

პოლიტიკა - 12:50, 20 Feb, 2017

5438

საქართვეოს მთავარი პროკურორის მოადგილის განცხადებით, „ციანიდის საქმეში“ არის მოწმეთა ჩვენებები, რომლებიც პირდაპირ მიუთითებენ ბრალდებული დეკანოზის გიორგი მამალაძის მიერ დანაშაულის მომზადებაზე. როგორც გიორგი გაბიტაშვილი „კვირის პალიტრასთან“ ინტერვიუში აღნიშნავს, მიუხედავად იმისა, რომ ამოღებული ციანიდი, ოდენობის თვალსაზრისით მცირეა, ის საკმარისი იქნებოდა რამდენიმე ადამიანის მოსაკლავად. მისი თქმით, ამ დროისთვის გამოძიების მიერ დადგენილია, რომ დანაშაულის ჩადენის მოტივს წარმოადგენდა ანგარება:

„საქმეში არის მოწმეთა ჩვენებები, რომლებიც პირდაპირ მიუთითებენ ბრალდებულის მიერ დანაშაულის მომზადებაზე. გიორგი მამალაძის ბარგში, რომლითაც იგი მიემგზავრებოდა გერმანიაში, აღმოჩენილია ნატრიუმის ციანიდი, რომელიც საშიშია ადამიანის სიცოცხლისთვის.მისი გამოყენების შემთხვევაში სასიკვდილო შედეგი გარდაუვალია. მიუხედავად იმისა, რომ ამოღებული ციანიდი ოდენობის თვალსაზრისით მცირეა, საკმარისი იქნებოდა რამდენიმე ადამიანის მოსაკლავად“- განაცხადა გაბიტაშვილმა.

პროკურორის მოადგილე საგამოძიებო უწყების მისამართით გაკეთებულ კრიტიკუკლ განცხადებებსაც გამოეხმაურა და აღნიშნა, რომ სხვადასხვა ინტერესის მქონე ჯგუფები გარკვეულ სპეკულაციებს მიმართავდნენ, იმისთვის რომ საზოგადოება შეცდომაში შეეყვანათ და გამოძიების დისკრედიტაცია მოეხდინათ:

"ჩვენს მიერ გავრცელებულ განცხადებასთან დაკავშირებით ადგილი ჰქონდა სხვადასხვა ინტერესის მქონე ჯგუფების სპეკულაციებს, რაც მიზნად ისახავდა საზოგადოების შეცდომაში შეყვანას და გამოძიების დისკრედიტაციას. ლაპარაკი იყო ერთ-ერთი პირის მკვლელობაზე. არ გვითქვამს, რომ ეს პირი, შესაძლოა ყოფილიყო, მაღალი იერარქიის სასულიერო პირი, რასაც ვერც ამ ეტაპზე დაგიდასტურებთ და ვერც ვუარყოფთ. პირს რომლის მკვლელობასაც ამზადებდა გიორგი მამალაძე ვერ დაგისახელებთ. არ გამოვრიცხავთ, რომ გიორგი მამალაძის ქმედება შესაძლოა სხვა პირების წინააღმდეგაც ყოფილიყო მიმართული. ამიტომ გამოძიება მუშაობს რამდენიმე მიმართულებით", - განაცხადა გაბიტაშვილმა.