პატრიარქის დამონტაჟებული ვიდეო - მეუფე პეტრეს მორიგი ბრალდება შორენა თეთრუაშვილს

პოლიტიკა - 21:34, 19 Feb, 2017

16057

პატრიარქის დამონტაჟებული ვიდეო და ჭყონდიდელი მიტროპოლიტის მორიგი ბრალდება შორენა თეთრუაშვილს. მეუფე პეტრე ”იმედის” ეთერში, გადაცემა ”იმედის დროსთვის” მიცემულ ექსკლუზიურ ინტერვიუში აცხადებს, რომ აღნიშნული ფაქტი მაგალითია იმისა, თუ რის უფლებას ძელევს თავს პატრიარქის გამორემოცვა, როგორ იმყოფება ის იზოლაციაში და რამდენად არასრულფასოვნად ხდება უწმინდესის სიტყვების ჩვენამდე მოტანა.

,,მან მისცა თავს უფლება, თავისი ოქროს თევზების მეშვეობით გადაეჭრათ და ისე გამოეგზავნათ პატრიარქის ვიდეო“ - აცხადებს მეუფე პეტრე.

მისივე სიტყვებით, ამ ფაქტის გამოძიება ადვილი, თუმცა კვალი, მეუფეს თქმით, მხოლოდ ერთ ადამიანამდე მივა.

”პატრიარქის ვიდეოს არასრულ ვერსიას რაც შეეხება, დარწმუნებული ვარ კვალი მიგვიყვანს ისევ გათავხედებულ მდგომარეობამდე რუხი კარდინალისა, ეკლესიაში არსებულისა. დარწმუნებული ვარ, სხვა ვერც ერთი ადამიანი ამ პასუხისმგებლობას ვერ აიღებდა. დარწმუნებული ვარ, რომ პატრიარქი ბევრად უფრო კეთილად მოიხსენიებდა მამა გიორგი მამალაძეს თავის საუბარში და მან მისცა თავს უფლება, თავისი ოქროს თევზების მეშვეობით გადაეჭრათ და ისე გამოეგზავნათ.

ძალიან ადვილია გამოძიება ჩატარდეს. როგორც ვიცი ზუგდიდისა და ცაიშის ეპარქიიდან აიტვირთა. იქ ვკითხოთ, ვინც ატვირთა და როგორი სახით მიიღო. ან გამომგზავნმა გადაჭრა, მაგრამ კვალი აუცილებლად მიგვიყვანს, იმიტომ, რომ პატრიარქის გარემოცვაში სხვა პასუხისმგებლობის მქონე პირი ამ საკითხთან მიმართებაში მე არ მეგულება.

ეს არის ფაქტი იმისა, თუ რის უფლებას აძლევს თავს პატრიარქის გარემოცვა. როგორ იზოლაციაშია პატრიარქი და როგორ არასრულყოფილად ხდება პატრიარქის სიტყვის ჩვენამდე მოსვლა”, - განაცხადა ჭყონდიდელმა ეპისკოპოსმა მეუფე პეტრემ.