"პოლიტიკის რადიკალიზაცია მოხდება"- უგულავა R2- თან დაკავშირებით ხელისუფლებას აფრთხილებს

პოლიტიკა - 16:39, 19 Feb, 2017

2967

ევროპული საქართველოს ერთ-ერთი ლიდერის, გიგი უგულავას შეფასებით, თავისუფლების ბასტიონი და თავისუფლების ხაზი გადის რუსთავი2-ზე.

"ტესტი აქაც არს ძალიან მკაფიო - რუსთავი2 არის მთავარი მედია-ორგანიზაცია, რომელიც არ კონტროლდება ხელისუფლებისგან. ჩვენნაირ ქვეყანაში, ეს არის ერთადერთი ტესტი თავისუფლების, კონტროლდება თუ არა ესა თუ ის მედიასაშუალება და იმეორებს თუ არა სახელისუფლებო ნარატივს"- აღნიშნა გიგი უგულავამ.

მისი განცხადებით, "თუ რუსთავი2-ზე მოხდა ის, რაც აქვს ხელისუფლებას და ივანიშვილის ჩაფიქრებული, მოხდება პოლიტიკის რადიკალიზაცია".

უგულავას თქმით, „რუსთავი 2“ მთავარი მედიაორგანიზაციაა, რომლის დასაცავად 30 000 ადამიანი გამოვდა.

"ეს არის თავისუფლების ბასტიონი და სწორედ დღეს თავისუფლების ხაზი გადის რუსთავი2-ზე. იქნება ისეთი რუსთავი2, როგორც დღეს არის, იქნება ქვეყანაში თავისუფლება, დავკარგავთ ჩვენ ამ თავისუფლებას, მაშინ ყველ ერთად აღმოვჩნდებით ისეთ ორმოში, რომ იქიდან ამოსვლა ქვეყანას ძალიან გაუჭირდება. თუ რუსთავი2-ზე მოხდა ის, რაც აქვს ხელისუფლებას და ივანიშვილის ჩაფიქრებული, მოხდება პოლიტიკის რადიკალიზაცია, სიტუაცია განსაკუთრებით დაიძაბება. ეს დღეს იყო წვეთი ზღვაში. დღეს აქ იმყოფებოდა დაახლოებით 30 000-მდე ადამიანი და ვინც ითვლის ხოლმე სახურავიდან, მინდა ვუთხრა: ეს არ იყო პარტაქტივი. პარტაქტივი იყო მხოლოდ 20-25%“ - განაცხადა უგულავამ.

ყოფილი მერის თქმით, „რუსთავი 2“-ის საქმით დაინგრევა მთლიანად სასამართლოს პრესტიჟი.

„სასამართლო პრაქტიკულად დანგრეულია. ეს ჩვენ კარგად გამოვცადეთ ამ ოთხი წლის მანძილზე. არც მანამდე არ იყო, სამწუხაროდ, დიდად თავისუფალ მდგომარეობაში, მაგრამ „რუსთავი 2“-ის საქმით დაინგრევა მთლიანად სასამართლოს პრესტიჟი, რომელსაც ქართული სახელმწიფო მომდევნო 10 წელი ვეღარ აღადგენს"- აღნიშნა უგულავამ და საქმის განმხილველ მოსამართლეებს მიმართა:

"თქვენ ხომ კარგად იცით, მეგობრებო, რომ პროფესიულ სიკვდილს მოაწერთ ხელს? მეორე კურსელი იურისტიც კი გეტყვით, რომ ის გადაწყვეტილება, რომელიც ურთმელიძემ მიიღო და შემდეგ ნაზღაიძემ დაამოწმა სამართალთან კონსტიტუციასთან არანაირ კავშირში არ არის"- განაცხადა გიგი უგულავამ.