ფიქრია ჩიხრაძე: რთულია კრიტიკული ტელევიზიის ეკრანზე გაჩერებულ შავ კვადრატს ხედავდე (ვიდეო)

პოლიტიკა - 11:16, 19 Feb, 2017

5759

19 თებერვალს საქართველოს პარლამენტის წინ დაგეგმილ აქციას და "რუსთავი 2" საპროტესტო მაუწყებლობის რეჟიმზე გადასვლას საქართველოს პრეზიდენტის პოლიტიკური მრჩეველი ფიქრია ჩიხრაძე გამოეხმაურა. პრეზიდენტის მრჩეველი აცხადებს, რომ გიორგი მარგველაშვილი ყოველთვის აქტურ თანადგომას უცხადებდა როგორც "რუსთავი 2-ს" ასევე სხვა მედიასაშუალებებს, რადგან მაყურებელს აუცილებლად უნდა ჰქონდეს არჩევანისა და ინფორმაციის თავისუფლად მიღების საშუალება.

"საქართველოს პრეზიდენტი ყოველთვის აქტიურ თანადგომას უცხადებდა მედიასაშუალებებს, მათ შორის რა თქმა უნდა "რუსთავი 2"-ს, რადგან ის არაერთხელ იყო საფრთხის ქვეშ ამ ბოლო პერიოდის განმავლობაში. დღესაც ძალიან რთული სანახავია, როდესაც აქტიური, კრიტიკული ტელევიზიის სიუჟეტების ნაცვლად ჩვენ ვხედავთ გაჩერებულ შავ კვადრატს და ძალიან გვინდა იმედი ვიქონიოთ, რომ ყველა პრობლემა, რომელიც დაკავშირებულია რუსთავი 2-თან მოგვარდება ისე, რომ არ დაზარალდეს ტელეკომპანია, არ დაზარალდნენ ჟურნალისტები და მათ თავისუფალი მოღვაწეობის საშუალება ჰქონდეთ და არ დაზარალდეს მაყურებელი, რომელსაც უნდა ჰქონდეს არჩევანი სხვადასხვა ტიპის ტელევიზიებს შორის, სხვადასხვა ტიპის გადაცემებს შორის და ჰქონდეს ინფორმაციის თავისუფლად მიღების შესაძლებლობა," განაცხადა პრეზიენტის მრჩეველმა პოლიტიკურ საკითხებში.