ხელისუფლება პრეზიდენტის ინსტიტუტის წინააღმდეგ- კონსტიტუციონალისტი პრეზიდენტის არჩევის წესის ცვლილებას ეწინააღმდეგება

პოლიტიკა - 13:46, 17 Feb, 2017

1741

პრეზიდენტის უფლებამოსილების შეკვეცას და არჩევის წესის ცვლილებას ეწინააღმდეგება კონსტიტუციონალისტი კოტე ჩოკორაია.

როგორც "ნიუპოსტს" ჩოკორაიამ უთხრა, ხელისუფლების გადაწყვეტილება ნაწილობრივ თადარიგის დაჭერას ჰგავს, რომ მომავალი პრეზიდენტი, მოქმედი მთავარსარდლის მსგავსად დამოუკიდებელი არ იყოს.

"ხელისუფლების ეს მოქმედება მიმართულია პრეზიდენტის ინსტიტუტის წინააღმდეგ. მიუღებელია როგორც უფლებამოსილების შეკვეცა და პრეზიდენტის არჩევითობის წესის შეცვლა. ჩემი აზრით, პრეზიდენტის არჩევის პირდაპირი წესით დარჩენა არის მნიშვნელოვანი, მას უნდა დარჩეს ის მოქმედი ნომინალური თუმცა მნიშვნელოვანი ფუნქციები რომელიც გააჩნია და ეს ფუნქციები არის ორიენტირებული ხელისუფლების ძალაუფლების დასაბალანსებლად. მათ შორის თავდაცვის სფეროში, ასევე პრეზიდენტის ვეტო, მოსამართლეების დანიშვნა და სხვადასხვა სახელისუფლებო ინსტიტუტების ფორმირებაში მონაწილეობა, აქიდან გამომდინარე ჩემთვის ყოვლად მიუღებელია მოქმედებები, რომელიც არის დაანონსებული პრეზიდენტის ინსტიტუტის წინააღმდეგ"- აღნიშნა კოტე ჩოკორაიამ.

მისი თქმით, ასეთი "ცვლილებები საკონსტიტუციო უმრავლესობის პირობებში სახიფათოა".

"მარგველაშვილი არ აღმოჩნდა დამორჩილებული პრეზიდენტი და სასწრაფოდ ხდება ახალ არჩევნებამდე ამ პროცესების წარმართვა, საკონსტიტუციო რეფორმის განხორციელება დაჩქარებულ ვადებში განხილვის საჭიროება ქვეყანაში არ არსებობს, ძალზედ მნიშვნელოვანი გამოწვევებია მისახედი. ამის გარდა სხვა პოლიტიკურ რეალობაში, რომელიც შეიძლება პირდაპირი წესით იყოს არჩეული საფრთხის შემცველი შეიძლება იყოს კონკრეტული პოლიტიკური ძალისთვის. ამიტომ მაქსიმალურად ცდილობენ, რომ შესაძლო საფრთხეები რაც შეიძლება სწრაფად აღმოფხვრან, იმიტომ რომ პირდაპირი წესით არჩეული ადამიანი, რომელსაც გარკვეული პოლიტიკური უფლებამოსილებები გააჩნია , პოლიტიკური თვალსაზრისით შეიძლება ვიღაცისთვის კონკურენტი იყოს, რადგან მას აქვს მაღალი პოლიტიკური ლეგიტიმაცია და ხალხის მხარდაჭერა" - თქვა ექსპერტმა.