ე.წ. ციანიდის საქმე - ხელისუფლება დამატებით კომენტარს არ აკეთებს, ოპოზიცია შოთაძეს პარლამენტში იბარებს

პოლიტიკა - 10:23, 17 Feb, 2017

1951

ე.წ. ციანიდის საქმეზე ხელისუფლებისა სა ოპოზიციის შეფასებები კვლავ რადიკალურად განსხვავებულია.

რეზონანსულ საქმეზე ოპოზიცია მთავარ პროკურორს პარლამენტში იბარებს. მათი თქმით, პროკურატურის გავრცელებული ინფორმაცია ფარსია.

ე.წ. ციანიდის საქმეზე არსებული დეტალებისა და მტკიცებულებების გასაჯაროების აუცილებლობაზე საუბრობს ნაციონალურ მოძრაობა.

ნიკა მელიას თქმით, პროკურატურამ, პრემიერმინისტრმა და ქართული ოცნების ლიდერებმა საზოგადოებას ბოდიში უნდა მოუხადონ.

„ყველა ადამიანს, რომელიც ამ ქვეყანაში ცხოვრობს, ჰქონდა ღრმა რწმენა, რომ საუბარია პატრიარქზე და უმაღლეს სასულიერო პირზე. დღეს, როცა პროკურატურა და ქართული ოცნება საუბრობს, რომ იცით რა სასულიერო პირი არაფერ შუაში არ არის, როგორც მინიმუმ ეს არის შემთხვევა, რომ პრემიერმინისტრი, პროკურატურა და მთელი ქართული ოცნება გამოვიდეს პირდაპირ ეთერში და მთელ საზოგადოებას მოუხადოს ბოდიში,“ - განაცხადა ნიკა მელიამ.

მოძრაობა თავისუფლებისთვის - ევროპული საქართველოს ლიდერი გიგი უგულავა კი აღნიშნავს, რომ პროკურატურის მიერ დაწყებულ გამოძიებას არ ენდობა.

„გამოდის, რომ არც პატრიარქზეა საუბარი, აღარც უმაღლეს საეკლესიო იერარქებზე და თურმე საერთოდ შორენა თეთრუაშვილზეა და ბოლოს შეიძლება რომელიღაცა კარისკაცამდე ჩავიდნენ, რომელიც ბერლინში საერთოდ არ იმყოფებოდა. ამ ყველაფრის შემდეგ ბუნებრივია, სანდოობა ამ გამოძიების და მთლიანად ამ წარმოდგენის არის ძალიან დაბალი. აქედან გამომდინარე, ეს არის ჩიხი, სადაც შევიდა მთავრობა და დღევანდელი განცხადებებიდან რაც ჩანს, არ აპირებენ ამ ჩიხიდან გამოსვლას,“ - აცხადებს

პარლამენტის თავმჯდომარე. ირაკლი კობახიძე შეფასებებისგან თავს იკავებს.

„ნებისმიერი განცხადება, რომელიც კეთდება გამოძიების საბოლოო დასრულებამდე, არის დამაზიანებელი თავად გამოძიებისთვის. აქედან გამომდინარე, მე პირადად თავს შევიკავებ ასეთი ტიპის განცხადებების გაკეთებისგან. მთავარია, ჩვენ არ ვიჩქაროთ, მთავარია დაველოდოთ გამოძიებას, გამოძიებამ უნდა გასცეს საბოლოოდ პასუხი ყველა იმ კითხვას, რომელიც ჩვენ გვაქვს აღნიშნულ საქმესთან დაკავშირებით. ეს არის უმნიშვნელოვანესი საქმე, საუბარია ძალიან მძიმე დანაშაულზე,“ - განაცხადა ირაკლი კობახიძემ.