"ქრთამი არა ტოროლა! კანონის დარღვევით მოპოვებულ მტკიცებულებას იურიდიული ძალა არა აქვს"

"ქრთამი არა ტოროლა! კანონის დარღვევით მოპოვებულ მტკიცებულებას იურიდიული ძალა არა აქვს" - ზაზა ჭაია

პოლიტიკა - 18:41, 16 Feb, 2017

6399

„სამართალდამცავთა ლიგის“ წევრი ზაზა ჭაიას "რუსთავი 2"- ის გენერალური დირექტორისა და თბილისის საქალაქო სასამართლოს ყოფილი თავმჯდომარის ფარული ჩანაწერების მოპოვებისა და მისი გავრცელების ირგვლივ კითხვები აქვს.

ჭაია დეპუტატ თალაკვაძის განცხადებასაც ეხმაურება და ამბობს, რომ საქმე ,,ქრთამის მიცემის" გამო კი არა, არამედ ,, პირადი მიმოწერის, ტელეფონით საუბრის ან სხვაგვარი ხერხით შეტყობინების საიდუმლოების დარღვევის" - საქ. სსკ-ის 159-ე მუხლით მიმდინარეობს
"ქრთამი არა ტოროლა!14 თებერვალს, საქართველოს პარლამენტის დეპუტატმა ბ-ნმა ა. თალაკვაძემ პრესკონფერენცია გამართა და ,,გვარამია-ახვლედიანის სავარაუდო კორუფციული გარიგების მატერიალური მტკიცებულებებზე" დაყრდნობით, სამართალდაცველებს ,,ფაქტის სამართლებრივი შეფასებსკენ" და ,,სწრაფი და ეფექტური გამოძიებისკენ" მოუწოდა. ბ-ნი თალაკვაძე სამართალდაცველთა ,,შეგულიანებით" ,,არ დაკმაყოფილდა" და აშკარად სხვის მიერ დაწერილ ტექსტში, ბ-ნ გვარამიას ,,ბრალის" პასაჟები წაიკითხა. ბ-ნმა თალაკვაძემ დამტკიცებულად მიიჩნია, რომ გვარამია, ,,სასამართლოს მოქმედ თავმჯდომარეს, სკანდალით გადადგომის სანაცვლოდ მილიონებს სთავაზობდა ქრთამის სახით" და სამართალდაცველებს ,,ბრალეული პირების გამოვლენა", ქართულად, რომ ვთქვათ, დამოუკიდებელი ტელოკომპანია რუსთავი 2-ის დირექტორის დაკავება, ისე მოსთხოვა, რომ არც გაწითლებულა. თუ ქუხილია ქუხილი იყოსო, იფიქრა ბ-ნმა თალაკვაძემ და გვარამიას წინააღმდეგ ,,სამართებლივი რეაგირება", ჩვენს ენაზე - დაკავება, საქართველოში, ,,კორუფციული გარიგებების" აღმოფხვრის, ,,წინაპირობად და გარანტიად" გამოაცხადა. სულო ცოდვილო, ბ-ნო არჩილ, ან თქვენ რას წვალობდით, ან იურისტებს რატომ აწვალებდით ამ ტექსტის წერით, პირადად, რომ გეთხოვათ გვარამიასთვის, შენი ციხეში ჯდომით საქართველოში კორუფცია აღმოიფხვრებაო, გარწმუნებთ გვარამია თავის ფეხით წავიდოდა იქ, სადაც მისი ხილვის წყურვილი ასე გკლავთ. ახლა კი მოკრძალებული შეფასებები საზოგადოებისთვის. გვარამია-ახვლედიანის ფარული აუდიო ჩანაწერი, რომელზეც ასე წუხს ბ-ნი თალაკვაძე, უკანონოდ მოპოვებული, ანუ მოპარული იქნა, გვარამიას, პირადი კომპიუტერის სამსახურეობრივი სერვერიდან და უკანონოდ იქნა გავრცელებული. საქმეც ,,ქრთამის მიცემის" გამო კი არა, არამედ ,, პირადი მიმოწერის, ტელეფონით საუბრის ან სხვაგვარი ხერხით შეტყობინების საიდუმლოების დარღვევის" - საქ. სსკ-ის 159-ე მუხლით მიმდინარეობს. ბ-ნი თალაკვაძე არ ინტერესდება:1. თუ როგორ შეაღწიეს გვარამიას კომპიუტერში.2. თუ ვინ შეაღწია გვარამიას პირად კომპიუტერში.3. თუ როგორ მოიპოვეს გვარამიას კომპიტერიდან ჩანაწერი.4. თუ ვინ მოიპოვა გვარამიას კომპიტერიდან აუდიო ჩანაწერი.5. თუ ვინ გაავრცელა გვარამია-ახვლედიანის ფარული აუდიო ჩანაწერი.ან კი გვარამიას კომპიუტერში შეღწევა და პირადი მიმოწერის დარღვევა რაში ანაღვლებს, დეპუტატი, ,,იურიდიულად", ხომ ქრთამის მიცემას ,,უჩხიკინებს". თუმცა ბ-ნი თალაკვაძე ქრთამის ნაწილშიც ,,მოიკოჭლებს". სახ. უნივერსიტეტის I კურსის სტუდენტმაც კი იცის, რომ საქართველოს კონსტიტუციის 42-ე მუხლის მე-7 პუნქტის და საქ. სსსკ-ის მიხედვით, ,,კანონის დარღვევით მოპოვებულ მტკიცებულებას იურიდიული ძალა არა აქვს" და გვარამის კომპიუტერიდან უკანონოდ მოპოვებული, აუდიო ჩანაწერის ,,ექსპერტიზა", მის ციხეში გამოკეტვის საბაბად ვერ გამოდგება. ,,სამწუხაროდ", გვარამია, ვერც ,,ქრთამის მიცემა" საქ. სსკ-ის 339-ე მუხლში ,,ჯდება", მატერიალურად ქრთამი მას არავისთვის გადაუცია, ხოლო ,,ქრთამის შეთავაზება" იმითაც ბათილდება, რომ გვარამიას ,,სასარგებლოდ", ბ-ნ ახვლედიანს არ ,,განუხორციელებია რაიმე ქმედება მიზნის მისაღწევად" და თანამდებობიდან ,,სკანდალურად" არ გადამდგარა, ის თბილისის საქალაქო სასამართლოს თავმჯდომარეობიდან ,,სკანდალურად", იუსტიციის უმაღლესმა საბჭომ გაათავისუფლა. რაღა დაგვრჩა ბ-ნო არჩილ? 1 საათიანი გვარამია-ახვლედიანის ფარული აუდიო ჩანაწერის 30 წუთიან მონაკვეთზე, შსს-ს ,,ექსპერტიზა", ფირის ,,უწყვეტობაზე და ავთენტურობაზე"? თუ 3 პირის ფარული აუდიო ჩანაწერის, 2 პირის ჩანაწერად წარმოდგენა? იმის გათვალისწინებით, რომ გვარამიას ჟურნალისტური საქმიანობის განხორციელებაც შეეძლო, ხოლო ბატონები: გვარამია და ახვლედიანი კატეგორიულად უარყოფენ, ფინანსურ თემაზე საუბარსაც კი, სამართალი რუსთავი 2-ის დირექტორის მხარეს დგას, ხოლო ქართული საზოგადოება ყოველთვის მას იცავს, ვის მხარესაც დგას სამართალი!"- წერს „სამართალდამცავთა ლიგის“ წევრი.