რას ამბობს დაკავებული დეკანოზი ირაკლი მამალაძეზე

რას ამბობს დაკავებული დეკანოზი ირაკლი მამალაძეზე - ახალი მესიჯები საკნიდან

პოლიტიკა - 16:55, 15 Feb, 2017

12979

დეკანოზ გიორგი მამალაძის ადვოკატმა მისი დაცვის ქვეშ მყოფ სასულიერო პირი მოინახულა. გიორგი ფანცულაიას თქმით, მან მამა გიორგი მამალაძეს ინფორმაცია გადასცა იმის შესახებ, თუ რას აცხადებდა ე.წ ციანიდის საქმის ერთ-ერთი მთავარი მოწმე ირაკლი მამალაძე, აღნიშნულ საქმესთან დაკავშირებით. ადვოკატის განცხადებით, ჟურნალისტ ირაკლი მამალაძეს, რომელმაც გავრცელებული ინფორმაციით დეკანოზის საუბარი ფარულად ჩაწერა, ნამდვილად აკავშირებს ნათესაური კავშირი დაკავებულ სასულიერო პირთან.

„მე მას გადავეცი ირაკლი მამალაძის სატელევიზიო გამოსვლა. აღნიშნულთან დაკავშირებით მან დამაბარა მხოლოდ ის, რომ ირაკლი მამალაძე არის მისი გარე ბიძაშვილი, ის არის ირაკლი მამალაძის ძმისშვილის ნათლია და ის არის ირაკლი მამალაძის უახლოესი მეგობარი,"- აღნიშნა ფანცულაიამ.

ადვოკატის განცხადებით, მამა გიორგი მამალაძე ფიქრობს, რომ ხელისუფლება შეცდომაშია შეყვანილი და იმედს გამოთქვამს რომ რეალობა მალე გაირკვევა:

"ის ფიქრობს, რომ ხელისუფლების ორგანოები შეცდომაში არიან შეყვანილნი და იმედი აქვს, რომ ეს მდგომაროება გამოსწორდება და რეალურად დაინტერესდებიან იმით, რომ ის არაა დამნაშავე. პლუს ამას განსაკუთრებულად მკაფიოდ დამაბარა კიდევ ერთხელ, რომ ის ითხოვს ოჯახის უსაფრთხოებას. ბოლომდე ჩემთანაც არ გაიხსნა, თუ რატომ ითხოვს ასეთი კატეგორიულობით ამას,“- განაცხადა ადვოკატმა.

ადვოკატის თქმით, მას უფლება არ აქვს საქმის კონკრეტულ დეტალებზე და მოწმეთა ვინაობაზე ისაუბროს და პროკურატურას კიდევ ერთხელ მოსთხოვა გაუთქმელობის ხელწერილის გაუქმება.