ე.წ. „ციანიდის საქმეზე“ საპარლამენტო უმრავლესობაში კომენტარები კეთდება. გია ვოლსკი ჟურნალისტებთან საუბრისას აცხადებს, რომ საქართველოს მთავარმა პროკურატურამ აღნიშნულ საქმესთან მიმართებით მეტი ინფორმაცია უნდა გასცეს:

„პროკურატურამ რასაკვირველია, უნდა გასცეს მეტი ინფორმაცია, მაგრამ მთავარია, რას მიიტანს ის სასამართლოში, სადაც საკითხი უნდა გადაწყდეს. მე დარწმუნებული ვარ, რომ ინფორმაციის გაცემა იქნება უკეთესი, მაგრამ უნდა გავითვალისწინოთ, რომ საქმე ეხება ეკლესიას, ინსტიტუტს, რომლისადმი პოზიტიური დამოკიდებულება უამრავი ფაქტორით არის განპირობებული. ათჯერ უნდა დაფიქრდეს პროკურატურა, რა სახის ინფორმაციას და როგორ მასალას წარმოადგენს. ასევე ექსპერტები უნდა ისხდნენ და ფიქრობდნენ, როგორ იმოქმედებს ეს საზოგადოებრივ განწყობებზე. ეს ჩემი აზრია, ვინმემ შეიძლება შემისწოროს, რომ სამართალი ერთია ყველასთვის. რომაული სამართალი ამბობს, რომ სამართალი უნდა აღსრულდეს, თუნდაც ქვეყანა დაინგრეს. მაგრამ დღევანდელი რეალობა გასათვალისწინებელია“, - განაცხადა გია ვოლსკიმ.

შეგახსენებთ, რომ საუბარია დეკანოზ გიორგი მამალაძის საქმეზე, რომელიც მაღალი იერარქიის სასულიერო პირის მკვლელობის მომზადების მცდელობისთვის არის დაკავებული. აღნიშნული ინფორმაცია კვირას რუსთავი 2-ის გადაცემა „P.s.“-ში გაჟღერდა, რასაც ორშაბათს მთავარ პროკურატურაში საგანგებო ბრიფინგი მოჰყვა.