დაკავებული დეკანოზი ადასტურებს, რომ სკანდალურ წერილში მოყვანილი ფაქტების შესახებ პატრიარქს ნამდვილად მისწერა

პოლიტიკა - 14:59, 14 Feb, 2017

5013

"რუსთავი 2"- ის ინფორმაციით, მაღალი იერარქიის სასულიერო პირის მოწამვლის მცდელობის საქმეში ბრალდებული დეკანოზი მამა გიორგი მამალაძე აცხადებს, რომ გუშინ "რუსთავი2" - ის ეთერში გახმაურებულ სკანდალურ წერილში მოყვანილი ფაქტების შესახებ ის წერილებს საქართველოს კათოლიკოს პატრიარქს, ილია მეორეს 2015 წლიდან უგზავნიდა.

რუსთავი 2 - მა წერილის ავთენტურობის დადგენის მიზნით, ბრალდებულ მამა გიორგი მამალაძის ადვოკატს თხოვნით მიმართა, პატიმართან შეხვედრის დროს დაესვა კითხვა მისთვის, ჰქონდა თუ არა დეკანოზ გიორგი მამალაძეს ნამდვილად გაგზავნილი მსგავსი შინაარსის წერილი პატრიარქისთვის.

ადვოკატმა გიორგი ფანცულაიამ "რუსთავი2"- ს განუცხადა, რომ დღეს შეხვდა პატიმრობაში მყოფ დეკანოზ გიორგი მამალაძეს და წერილის შესახებ ჰკითხა.

ადვოკატის ინფორმაციით, წერილის სრულ შინაარსს, რომელიც "რუსთავი 2" -მა გაახმაურა, ის ვერ გაეცნო, თუმცა დაადასტურა, რომ წერილში მოყვანილი ფაქტების შესახებ მან პატრიარქის ინფორმირება რამდენჯერმე მოახდინა.

"რუსთავი 2"- ის ინფორმაციით, დეკანოზი გიორგი მამალაძე ამბობს, რომ უფრო მწვავე შინაარსის წერილები აქვს პატრიარქისთვის გაგზავნილი, სადაც საპატრიარქოს ქონების დატაცების შესახებ არის საუბარი.