წარსულში ჩვენი ცუდად მოქცევების გამო ამართლებთ დღეს თქვენს ცუდად მოქცევას

წარსულში ჩვენი ცუდად მოქცევების გამო ამართლებთ დღეს თქვენს ცუდად მოქცევას - ბობოხიძე "ქართულ ოცნებას"

პოლიტიკა - 19:53, 10 Feb, 2017

2063

პარლამენტის პლენარულ სხდომაზე, სადაც ფარული მიყურადების თაობაზე საკანონმდებლო პაკეტს განიხილავენ დილიდან ისმის ურთიერთბრალდებები. საპარლამენტო უმცირესობის წევრმა აკაკი ბობოხიძემ „ქართული ოცნების“ წევრებს მიმართა და აღნიშნა, რომ ხელისუფლების არგუმენტი, რა ცუდად იქცეოდა „ნაციონალური მოძრაობა“, არგუმენტი არ არის.
"პორნოგრაფიის ყურების სურვილი თუ გქონდათ, გეთქვათ და გაყურებინებდნენ. თქვენ ხომ იგივეს აგრძელებთ და გაცილებით უფრო მასშტაბურად?"- თქვა დეპუტატმა საპარლამენტო ტრიბუნიდან.
„წარსულში ჩვენი ცუდად მოქცევების გამო ამართლებთ დღეს თქვენს ცუდად მოქცევას. კანიბალი ახსენეს და ჩავთვალოთ, რომ კანიბალი ვიყავი, ოღონდ აღარ ვჭამ ადამიანებს, მოვდივარ და ვხედავ, რომ თქვენ იწყებთ დღეს კანიბალიზმს და გეუბნებით, რომ ცუდია. არა, რა კარგი გემო ჰქონიაო, თქვენ ლაპარაკობთ და აგრძელებთ ადამიანების ჭამას. ჩვენ იმას კი არ ვამბობთ, რომ წარსულზე არ ვილაპარაკოთ, მაგრამ დღევანდელი შეცდომების „გაპრავება“ წარსული შეცდომებით როგორ ხდება? ძიძიგურო, როდესაც შენ 2004 წელს მოხვედი ხელისუფლებაში „ნაციონალურ მოძრაობასთნ“ ერთად და შემდეგ ვაჟკაცურად გახვედი, მეგონა, რომ პრინციპების დარღვევის გამო წახვედი, მაგრამ სამწუხაროდ აღმოჩნდა, რომ მხოლოდ პირადი კეთილდღეობა იყო შენი მოტივი. დღეს გატრუნული ზიხარ და ყველა იმ დარღვევას, რომელზეც გველაპარაკებით წარსულში, ხელახლა იმეორებთ"- თქვა ბობოხიძემ.
მისი თქმით, უმრავლესობა სახელმწიფო ინტერესების გამო კი არ აპირებთ სუს-ი ამოქმედოს, "არამედ იმ ერთი კაცის სამსახურის გამო, რომელსაც მიაჩნია, რომ „ასავალ-დასავალია“ ეტალონი და ასავალ-დასავალად აქცია დღევანდელი სუს-ი. ის ჭრის, კერავს, ამონტაჟებს. სუს-ი გადაიქცა ჭორიკნების ორგანოდ".