2019 წელს გადავდგები - ვასილ მაღლაფერიძე

პოლიტიკა - 16:45, 10 Feb, 2017

2635

საზოგადოებრივი მაუწყებლის გენერალურმა დირექტორმა ვასილ მაღლაფერიძე აცხადებს, რომ ექნება თუ არ ექნება 15%-იანი რეიტინგი საზმაუს ის 2019 წელს ყველა შემთხვევაში გადადგება.

"თუ 2019 წელს მიზანი მიღწეული იქნება და საზოგადოებრივი მაუწყებელი შეძლებს პოლიტიკური მოთამაშე გახდეს, მე გადავდგები და ვიქნები ამაყი. თუ ვერ შესრულდა, მაინც გადავდგები. როდესაც ეს შესრულდება, მე ვიტყვი, აი, აწყობილია ტელევიზია, პოლიტიკური, შემეცნებითი თუ საგანმანათლებლო კუთხით და ჩავთვლი, რომ ჩემი საქმე გაკეთებულია. ეს იქნება ჩემი პასუხისმგებლობა, სხვა პასუხისმგებლობა არ ვიცი. BBC-ზე თუ ჩამოიწევს რეიტინგი, მოხსნიან დირექტორს. არ არსებობს ევროპის ქვეყანა, რომელიც საზოგადოებრივ მაუწყებელს 2%-ზე დაბალ რეიტინგს მოუთმენდა და ამაზე იბაასებდა ამდენ ხანს. ნამდვილად არ მოითმენდნენ გადასახადის გადამხდელები", - აღნიშნა ვასილ მაღლაფერიძემ.
ამასთან დღესვე გაირკვა, რომ საზოგადოებრივი მაუწყებლის რეორგანიზაციის გეგმაში კორექტივები შევიდა. მაღლაფერიძის თქმით, მისი გეგმის დამტკიცების შემთხვევაში ყველა გადაცემა კი არ დაიხურება, არამედ ფილტრს გაივლის.

ვასილ მაღლაფერიძემ არასამთავრობო და მედიის წარმომადგენლებთან შეხვედრის დასრულების შემდეგ კომენტარი მედიასთან არ გაუკეთებია.