„არსად ისე არ ამაყობენ საკუთარი დამწერლობით, როგორც საქართველოში, მაგრამ არსად საკუთარ დამწერლობას ისე ცუდად არ ექცევიან, როგორც საქართველოში“ - წერს ფოტოხელოვანი გოგა ჩანადირი და სახელმწიფო მოხელეებს გამოფხიზლებას ურჩევს.

გოგა ჩანადირი: „უამრავი კაფე-ბარი, სასტუმრო, მაღაზია და სხვა კერძო დაწესებულება არღვევს სახელმწიფო კანონს რეკლამის შესახებ.
კანონი თითოეულს აბრაზე სახელმწიფო ენაზე, ანუ ქართულად შესრულებული წარწერის გაკეთებას ავალდებულებს.
თანაც, ისე, რომ ზომით და რაოდენობით ქართული უცხოურზე მცირე ზომის ან რაოდენობის არ უნდა იყოს.

სახელმწიფო მოხელეებო, სად არის თქვენი პასუხისმგებლობა?
უამრავი კერძო პირი თვალებში ნაცარს გვაყრის, კანონს არღვევს, აგერ, ჩვენი ქალაქების ცენტრებში მხოლოდ უცხოური წარწერები აქვთ და პასუხს არავის სთხოვთ.
დავიცვათ კანონი და სახელმწიფო ენა

აი, ეს წერია კანონში:

სახელმწიფო კანონი რეკლამის შესახებ:

2 1. საქართველოს მთელ ტერიტორიაზე აბრაზე წარწერა შესრულებული უნდა იყოს სახელმწიფო ენაზე, ხოლო სურვილის შემთხვევაში იგი შეიძლება შესრულდეს აგრეთვე უცხოურ ენაზე. უცხოურენოვანი წარწერა ზომით არ უნდა აღემატებოდეს სახელმწიფო ენაზე შესრულებულ წარწერას.

3. უცხო ენაზე შესრულებული წარწერა ზომით (ყველა შემთხვევაში) და რაოდენობით (გარდა ტელეპროდუქციისა) არ უნდა აღემატებოდეს სახელმწიფო ენაზე შესრულებულ (ტრანსლიტერირებულ) ფორმას.“