ხანძრის შედეგად ფონიჭალაში მამაკაცი გარდაიცვალა. რუსთავის გზატკეცილის 127 ნომერში ერთსართულიანი სახლი და მეზობლად მდებარე ორი სახლის სახურავი დაიწვა. როგორც ცნობილია, გარდაცვლილი მამაკაცი სახლში მარტო იმყოფებოდა.

შემთხვევის ადგილზე თბილისის მერი და კრწანისის მაჟორიტარი დეპუტატი იმყოფებოდნენ. დავით ნარმანიას განცხადებით, დაზარალებულებს დროებით სასტუმროში განათავსებენ და დახმარებას გაუწევენ.

„სამწუხაროა, ის, რომ ერთი ასაკოვანი მამაკაცი გარდაიცვალა ხანძრის შედეგად. მოსახლეობას, რომელთა სახლებიც გარშემო დაზიანდა, დავეხმარებით, მათ შევიყვანთ სასტუმროში და დროებით დავაბინავებთ,“ - განაცხადა დავით ნარმანიამ.

ფაქტზე უკვე დაწყებულია გამოძიება გაუფრთხილებლობით ნივთის დაზიანების ან განადგურების მუხლით, რამაც ადამიანის სიცოცხლის მოსპობა გამოიწვია.