"მნიშვნელოვანია კონკრეტული პასუხი, ვინ ჩაიდინა, რა სანქცია მიესადაგება პირს, რომელიც უხეშად ჩაერია მოსამართლის საქმიანობაში"- დოლიძე

პოლიტიკა - 17:38, 07 Feb, 2017

1463

პრეზიდენტის საპარლამენტო მდივანი ანა დოლიძემ პროკურატურის მიერ უზენაესი სასამართლოს მოსამართლეებზე ზეწოლის საქმესთან დაკავშირებით დღეს გამოქვეყნებულ ინფორმაციაზე კომენტარი გააკეთა.

„ჩვენ მივესალმებით პროკურატურის მხრიდან საზოგადოებასთან აქტიურ კომუნიკაციას, თუმცა დღეს რაც ვიხილეთ, ეს არის პოტენციურად მტკიცებულებები საქმეზე. ჩვენთვის მნიშვნელოვანია შედეგი, რომელიც შეიძლება ამ საქმესთან დაკავშირებით დაიდოს. შედეგში იგულისხმება პასუხისგებაში მიცემა ან საქმის დახურვა, ან საბოლოო წერტილის დასმა იმ კითხვებზე, რა კითხვებიც დაისვა. დღეს ჩვენ ვხედავთ მტკიცებულებებს, ამ მტკიცებულებების გარჩევა საინტერესოა, მაგრამ უფრო მნიშვნელოვანია გავიგოთ კონკრეტული პასუხი, იყო თუ არა სისხლის სამართლის დანაშაული ჩადენილი, ვინ ჩაიდინა ეს და რა სანქცია მიესადაგება იმ პირს, რომელიც უხეშად ჩაერია მოსამართლის საქმიანობაში"- აღნიშნა დოლიძემ.

პრეზიდენტის საპარლამენტო მდივანი აცხადებს, რომ დღეს გასაჯაროებული ინფორმაციით, რთულია მთლიანად მსჯელობა იმაზე, თუ რა მტკიცებულებებია საქმეზე.

"დღეს ჩვენ ვიმყოფებით სისხლის სამართლის საქმის ერთ-ერთ ეტაპზე. დღეს გასაჯაროვდა მტკიცებულებები და რთულია მთლიანად მსჯელობა იმაზე, თუ რა მტკიცებულებებია საქმეზე, ვიდრე საბოლოო ჯამში, ასევე არ გავიგებთ იმას, როგორ იმართლებს თავს მეორე მხარე.

ეს იქნება სწორი, სამართლიანი სასამართლო პროცესი, რომელიც შესაბამის ადგილას უნდა წარიმართოს. ბოლოს მნიშვნელოვანია, ჩვენ გავიგოთ, ვინმე მიეცემა პასუხისგებაში თუ არა, არის დანაშაული სახეზე თუ არა და სწორედ ამ პასუხს ველოდებით ჩვენ საბოლოო ჯამში“, - განაცხადა ანა დოლიძემ.