"მორიგი ნაბიჯი ანექსიისაკენ"- პრეზიდენტი ცხინვალში დანიშნულ ე.წ. პლებისციტსა და საპრეზიდენტო არჩევნებს ეხმაურება

პოლიტიკა - 12:55, 07 Feb, 2017

2017

საქართველოს პრეზიდენტი ცხინვალში 9 აპრილს დანიშნულ ე.წ. პლებისციტსა და საპრეზიდენტო არჩევნებთან დაკავშირებით განცხადებას ავრცელებს.
ქვეყნის პირველი პირი რუსეთს მოუწოდებს გადადგას რეალური ნაბიჯები საქართველოს ოკუპირებული ტერიტორიების დეოკუპაციისა და ნაკისრი საერთაშორისო ვალდებულებების შესრულებისაკენ.
პრეზიდენტი საერთაშორისო თანამეგობრობას მიმართავს რომ წინ აღუდგნეს ე.წ. არჩევნებსა და პლებისციტის შედეგების ლეგიტიმაციის ნებისმიერ მცდელობას.

"პლებისციტი, არჩევნები ან რაიმე სხვა ქმედება რომელიც გულისხმობს მოსახლეობის ნების თავისუფალ გამოხატვას ვერ განხორციელდება ტერიტორიაზე, რომელიც ოკუპირებულია უცხო სახელმწიფოს მიერ საიდანაც გამოდევნილია მკვიდრი მოსახლეობის უმრავლესობა, სადაც ჩატარდა ეთნიკური წმენდა და დღეს ადგილზე ეფექტური კონტროლი განმახორციელებელ ერთადერთ ძალად გველენება რუსეთის ფედერაცია.
ნებისმიერ მცდელობა, რომ საქართველოს ოკუპირებულ რეგიონს შეეცვალოს სახელწოდება საქართველოს ცენტრალური ხელისუფლების თანხმობის გარეშე, წარმოადგენს საქართველოს სახელმწიფო სუვერენიტეტისა და მთლიანობის ხელყოფის მცდელობას და მორიგ ნაბიჯს, გადადგმულს საქართველოს ოკუპირებული ტერიტორიების შემგომი ანექსიისაკენ.

კვლავაც მოვუწოდებთ რუსეთის ფედერაციას, რომ გადადგას რეალური ნაბიჯები საქართველოს ოკუპირებული ტერიტორიების დეოკუპაციისა და ნაკისრი საერთაშორისო ვალდებულებების შესრულებისაკენ. მივმართავთ საერთაშორისო თანამეგობრობას, რომ წინ აღუდგნენ საქართველოს ტერიტორიული მთლიანობისა და სუვერენიტეტის ხელყოფას და ამ ე.წ. არჩევნებსა და პლებისციტის შედეგების ლეგიტიმაციის ნებისმიერ მცდელობას"- ნათქვამია პრეზიდენტის განცხადებაში.

ოკუპირებულ სამხრეთ ოსეთში სახელის გადასარქმევად რეფერენდუმი ჩატარდება.

დე ფაქტო რესპუბლიკის ე.წ. პრეზიდენტმა ლეონიდ თიბილოვმა რეფერენდუმის თარიღად მიმდინარე წლის 9 აპრილი დაასახელა. პლებისციტი და ე.წ. საპრეზიდენტო არჩევნები ერთ დღეს გაიმართება.

მოსახლეობამ პასუხი უნდა გასცეს შეკითხვას - ეთანხმება თუ არა რესპუბლიკას სახელად ალანია დაერქვას.