დავით უსუფაშვილთან და ,,ევროპულ საქართველოსთან“ პრეზიდენტი სამომავლო თანამშრომლობას არ ადასტურებს

პოლიტიკა - 21:42, 06 Feb, 2017

3073

დავით უსუფაშვილსა და ,,ევროპული საქართველოს“ წევრებთან პრეზიდენტის დახურულ შეხვედრებთან დაკავშირებულ კითხვას უპასუხა ტვ ,,იბერიას“ ეთერში გიორგი მარგველაშვილმა. პრეზიდენტი მათთან სამომავლო თანამშრომლობას არ ადასტურებს, თუმცა ამბობს, რომ ის ესუბრება პოლიტიკაში მყოფ ყველა მთავარ მოთამაშეს.

„ეს არის ნორმალური ფორმატი. ჩვენ, პოლიტიკოსები ერთმანეთს უნდა ვესაუბრებოდეთ, რომ ქვეყანაში შევქმნათ ნორმალური პოლიტიკური ცხოვრება, არა გამოგონილი დაპირისპირებები, არა გაბუტვები და გაქცევები, არამედ ნორმალური პოლიტიკური ცხოვრება და მე, ბუნებრივია, როდესაც არის შესაძლებლობა, ყველა პოლიტიკურ ძალას ვესაუბრები, რადგან მიმაჩნია, რომ ისინი არიან მთავარი მოთამაშეები პოლიტიკურ ცხოვრებაში და პოლიტიკურ ველზე“, - განაცხადა გიორგი მარგველაშვილმა.

რაც შეეხება პრეზიდენტის სამომავლო გეგმებს, მარგველაშვილმა აღნიშნა, რომ ამ კითხვაზე პასუხს პოლიტიკოსი იძლევა პოლიტიკური საჭიროებიდან და დინამიკიდან გამომდინარე.

,,დღეს, სიმართლე გითხრათ, ამ საკითხზე პოზიციის დაფიქსირება არ წარმოადგენს ჩემს პოლიტიკურ დღის წესრიგს“, - აღნიშნა გიორგი მარგველაშვილმა.