მოგეხსენებათ, რამდენიმე ხნის წინ მედიით გავრცელდა ინფორმაცია, რომ „ოცნებამ“ დავით ნარმანიას შემცვლელად შესაძლოა, კახა კალაძე ან მამუკა ხაზარაძე დაასახელოს.

ასევე, კულუარებში ერთი პერიოდი ბექა ოდიაშარიას კანდიდატურაც სახელდებოდა, რომელიც „ოცნების“ მაჟორიტარია კრწანისიდან და რომელიც, როგორც ამბობენ, პირდაპირ გიორგი კვირიაკშვილის კადრია, თუმცა იმ უახლოესი ინფორმაციების მიხედვით, რაც „ნიუპოსტისთვის“ 4 თებერვალს, საღამოს გახდა ცნობილი, მმართველი გუნდის თბილისის მერობის კანდიდატი შესაძლოა, ისევ დავით ნარმანია იყოს, რომელიც წარმოშობით სოფელ კოკიდანაა.

„ახლა, თავს ვერ დავდებ, რომ ჩემი მონაცენები უტყუარია, მაგრამ ის კი ზუსტად ვიცი, რომ ბიძინა ივანიშვილი მამუკა ხაზარაძეს, რომელთანაც მეტ-ნაკლებად კარგი ურთიერთბა აქვს, თბილისის მერად არ გაამწესებს. ზოგადად, მდიდარ ადამიანებს ერთმანეთი მაინცდამაინც არ უყვართ ხოლმე და ამ შემთხვევაშიც, ალბათ, სწორედ ეს ფაქტორი იმუშავებს, თუმცა არ გამოვრიცხავ, რომ ხაზარაძე მერობის კანდიდატად სხვა რომელიმე პარტიამ დაასახელოს.

რაც შეეხება კალაძეს, ენერგეტიკის მინისტრს, ალბათ, უნდა, რომ მერი გახდეს და, როგორც ვიცი, „გაზპრომთან“ მოლაპარაკებაც ავტონომიურ რეჟიმში სწორედ ამ მიზნით აწარმოა, ანუ იფიქრა, რომ თუ „გაზპრომის“ პირობებს მიიღებდა, ამით ბიძინა ივანიშვილის გულს საბოლოოდ მოიგებდა და მერობა გარანტირებული ექნებოდა, მაგრამ იმ ადამიანისგან, ვისაც „ოცნების“ „ვერხუშკასთან“ ძალიან კარგი ურთიერთობა აქვს, ვიცი, რომ მომავალი მერის ვინაობაზე მმართელი პარტია ჯერ არ ჩამოყალიბებულა.

უფრო მეტიც, ნარმანიამ, თურმე, „იქ, სადაც ჯერ არს“ იკითხა კიდეც, თუ ჩემი კანდიდატურა აღარ უნდა დააყენოთ, უმჯობესია, ახლავე მითხრათო, მაგრამ გაურკვეველი პასუხი მიიღო.

ისე, როგორც მე ვიცი, ნარმანია მერობაზე არც თავის დროზე გიჟდებოდა და როცა დაუძახეს და უთხრეს, რომ ინფრასტრუქტურის მინისტრობა უნდა დაეტოვებინა და მერის საარჩევნო კამპანიაში ჩართულიყო, იკითხა, მე რომ თბილისელი არ ვარო? ამაზე უპასუხეს, აქ თბილისელი არავინ ვართ და ეგ ილუზია, რომ თბილისი მხოლოდ თბილისელებისაა, უნდა დავამსხვრიოთო,“ - ჰყვება „ოცნების“ კულუარებს ინკოგნიტო პიროვნება.

„ნიუპოსტის“ წყარო იმასაც ამბობს, რომ მართალია, მერიაში და, ზოგადად, დედაქალაქის სტრუქტურებში ნარმანიას ბევრი ახლობელი და ნაცნობი დასაქმდა, მაგრამ ამის მიუხედავად, ნარმანია მაინც ცდილობს დამოუკიდებელი მოთამაშის იმიჯი შეიქმნას.

„იმის თქმა მინდა, რომ დავითი „ოცნების“ არც ერთი კლანის წევრი არ არის და შესაბამისად, ვინმეს ინტერესებს არ ატარებს. ჩემი დაკვირვებით, ის პირდაპირ ივანიშვილზეა „მიბმული“, თმცა ვერ გეტყვით, რომ ყოფილ პრემიერთან ხშირი და ინტენსიური კონტაქტი აქვს.

ივანიშვილს თბილისის მერად სწორედ ნარმანიას მსგავსი პიროვნება სჭირდება, რომელიც არც თავის კლანს შექმნის და რომელიც, ასევე, არც რომელიმე სახელისუფლებო კლანის წევრი გახდება, ანუ მერი ისეთი უნდა იყოს, რომელსაც ივანიშვილის მიმართ მუდმივი მადლიერების განცდა ექნება და ყველას და ყველაფერს იმ ჭრილში განიხილავს, მისი მიერ გადადგმული ნაბიჯი „მთავარს“ მოეწონება თუ არა,“ - აღნიშნავს „ნიუპოსტის“ რესპოდენტი, რომელიც არ გამორიცხავს, რომ თვითმმართველობის არჩევნებმა შესაძლოა, მმართველ ძალაში დაპირიპსირების პროვოცირება მოახდინოს, თუმცა ამ თემის გაშლისგან, ჩვენი თხოვნის მიუხედავად, ჯერჯერობით თავი შეიკავა.

რაც შეეხება ოპოზოციას, არსებული კულუარული ინფორმაციით, თვითმმართველობის არჩევნებში მონაწილეობს თითქმის ყველა ოპოზიციური პარტია მიიღებს, მათ შორის, „თავისუფალი დემოკრატებიც“, რომელიც 8 ოქტომბრის არჩევნებსი შემდეგ ლიდერებმა დატოვეს. ზოგი მიიჩნევს, რომ „ნაციონალებისგან“ წასულების მერობის კანდიდატი შეიძლება, გიგი უგულავა იყოს, მაგრამ უკვე იმის შესახებაც ითქვა, რომ „ნაციონალები“, მათგან წასულები, „გირჩი“ და ვაშაძის პარტია ადგილობრივ არჩევნებზე შეიძლება, ერთად გამოვიდნენ.

ჯერ უცნობია, თბილისის მერობის კანდიდატი „პატრიოტთა ალიანსს“ ეყოლება თუ არა, თუმცა 2013 წლის გამოცდილებიდან გამომდინარე, „პატრიოტები“ თბილისის თავზე თავიანთი დროშის აფრიალებას შეეცდებიან, თუმცა ირმა ინაშვილი მერობის კანდიდატი რომ აღარ იქნება, ეს ზუსტად არის ცნობილი - ის პარლამენტის ვიცე-სპიკერია.

ბურჯანაძის პარტიიდან თავის დროზე მერობის სურვილი, როგორც „ნიუპოსტს“ უთხრეს გიგლა ბარამიძეს ჰქონდა, მაგრამ ამ ეტაპზე იმის თქმა, რომ შევარდნაძის მთავრობის გუბერნატორ ბარამიძეს თბილისის მერობა ისევ უნდა თუ არა, ძნელია.

ზოგადად, პარტიები ამ საკითხებზე ჩამოყალიბებას გაზაფხულიდან დაიწყებენ - სწორედ მაშინ გააქტიურდება არაოფიციალური საარჩევნო კამპანიაც და იგივე მერობის შესაძლო კანდიდატებზე მეტ-ნაკლები ამომწურავი ცნონებიც მაშინ გახდება ცნობილი. მანამდე კი, მთავარ თემად, ბუნებრივია, ისევ მოსამართლეების სკანდალი და „რუსთავი 2“-ის საქმე რჩება. იმ შემთხვევაში, თუ „რუსთავი 2“ ქიბარ ხალვაშის ხელში აღმოჩნდა, ექსპერტები არ გამორიცხავენ, რომ ამან სათავე სამოქალაქო პროტესტს დაუდოს და მოვლენები იმ სცენარით განვითარდეს, რომლის შესახებაც დღეს არავინ ლაპარაკობს.

ირაკლი ბიძინაშვილი