"მოსამართლეებს შეტყობინებები ყოფილი ხელისუფლების მაღალჩინოსნისგან მიუვიდათ"- ლევან მურუსიძე

პოლიტიკა - 15:15, 03 Feb, 2017

3500

იუსტიციის უმაღლესი საბჭოს მდივანი ლევან მურუსიძე აცხადებს, რომ უზენაესი სასამართლოს მოსამართლეებს - ბესარიონ ალავიძეს და პაატა ქათამაძეს შეტყობინებები ყოფილი ხელისუფლების მაღალჩინოსნისგან მიუვიდათ.
აღნიშნული განცხადება მურუსიძემ უზენაესი სასამართლოს თავმჯდომარესთან შეხვედრის შემდეგ გააკეთა.
ლევან მურუსიძე არ აკონკრეტებს, ვინ არის ყოფილი ხელისუფლების თანამდებობის პირი, რომელმაც მოსამართლეებს ზეწოლის შემცველი შეტყობინებები გაუგზავნა.
მისი თქმით, ავთენტურობას პროკურატურა დაადგენს.

„სამწუხაროა, ჩემთვის ფაქტობრივად ახლა გახდა ცნობილი რეალურად რა შემთხვევას ჰქონდა ადგილი. არც მოსამართლეებს არ მოუმართავს ჩემთვის ამასთან დაკავშირებით. ერთადერთი, რაზეც შემიძლია გითხრათ, რომ საუბარია ყოფილი ხელისუფლების მხრიდან მაღალჩინოსნის სახელით მოუვიდათ აღნიშნულ მოსამართლეებს წერილები, ასევე იყო სატელეფონო შეტყობინება, რომელიც ამ მოსამართლეების მიერ მიტანილი იქნა უზენაესი სასამართლოს ხელმძღვანელთან და გადაგზავნილი იქნა პროკურატურაში,“ - განაცხადა ლევან მურუსიძემ.

მისივე თქმით, კარგი იქნებოდა იუსტიციის უმაღლეს საბჭოს აღნიშნული ფაქტის გახმაურებამდე სცოდნოდა ინფორმაცია მოსამართლეებზე შესაძლო ზეწოლის შესახებ.

„ქალბატონი ნინო რასაც ჩათვლის საჭიროდ, თავის პოზიციას თვითონ გაახმოვანებს. თუ დადგინდება, რომ ის რეალური წერილი არის ავთენტური და რეალურად ის პიროვნება, ვისზეც ამ წერილში არის მითითებული, ამ მოსამართლეებზე ახდენს ზეწოლას, ეს არის ძალიან ცუდი,“ - აცხადებს მურუსიძე.