პრეზიდენტის ვეტოზე უმრავლესობისგან იმდენად გაუგებარი კომენტარები მოვისმინეთ, რომ კრიტიკას ვერ უძლებს

პრეზიდენტის ვეტოზე უმრავლესობისგან იმდენად გაუგებარი კომენტარები მოვისმინეთ, რომ კრიტიკას ვერ უძლებს - ჩიხრაძე

პოლიტიკა - 11:15, 03 Feb, 2017

1213

სასამართლო რეფორმის საკითხზე დეპუტატებთან პრეზიდენტის შეხვედრას უმრავლესობის წევრები არ ესწრებიან - მმართველი პარტიის გადაწყვეტილება გიორგი მარგველაშვილის მრჩეველმა უკვე შეაფასა.
ფიქრია ჩიხრაძის განცხადებით, პრეზიდენტის ვეტოზე უმრავლესობის კომენტარები იმდენად გაუგებარია რომ კრიტიკას ვერ უძლებს.
„ჩვენ გავმართავთ კონსულტაციებს მათთან, ვინც მოვა. კიდევ ერთხელ მოვუწოდებთ ყველას, ვისაც სულ მცირედით მაინც ეხება ამ საკითხის გადაწყვეტა, ვეტო იქნება განხილული და ამ განხილვის დროს იხელმძღვანელოს სახელმწიფოებრივი ინტერესებიდან გამომდინარე, მოსამართლეთა და სასამართლოს თავისუფლების გარანტიებიდან გამომდინარე“, - განაცხადა ფიქრია ჩიხრაძემ.
პრეზიდენტის მრჩეველის შეფასებით, "ვეტოსთან დაკავშირებით უმრავლესობისგან იმდენად გაუგებარი კომენტარები მოისმინეს, რომლებიც უბრალოდ კრიტიკას ვერ უძლებს".
ფიქრია ჩიხრაძის განცხადებით, პრეზიდენტის ყველა შენიშვნა დაფუძნებულია ვენეციის კომისიის დასკვნებზე.

"ვეტო დაიწერა და გაიგზავნა პარლამენტში. ჩვენ ყველა ეტაპზე ვართ მზად ვისაუბროთ აღნიშნული საკითხების გადასაწყვეტად. ეს არის თემა, რომელიც ეხება საქართველოში ფუნდამენტური თავისუფლების თემას, შტოთა შორის ბალანსს და გაწონასწორების სისტემას, ასევე დამოუკიდებელი, თავისუფალი სასამართლოს თემას. ყველა ეს შენიშვნა დაფუძნებულია ვენეციის კომისიის დასკვნებზე. მე ვფიქრობ, ამაზე მნიშვნელოვანი საქართველოში ცოტა საკითხი შეიძლება არსებობდეს, ძალიან მნიშვნელოვანია ასეთ დროს ვეტო ბრძოლის იარაღად კი არ უნდა განვიხილოთ, კი არ გავიქცეთ და დავიმალოთ კონსულტაციებისგან, არამედ აბსოლუტურად ნორმალურია, დემოკრატიულ ვითარებაში ხელისუფლების სხვადასხვა წარმომადგენლები ხვდებოდნენ ერთმანეთს და ესაუბრებოდნენ სახელმწიფოებრივ საკითხებზე“, - განაცხადა ფიქრია ჩიხრაძემ.