"პოროშენკო მართავს მედიას, მთავრობას, მაგრამ ვერ მართავს ქვეყანას"- რა გეგმები აქვს სააკაშვილს საარჩევნოდ

პოლიტიკა - 13:14, 02 Feb, 2017

4442

საქართველოს მესამე პრეზიდენტმა და უკრაინის ოპოზიციის ერთ-ერთმა ლიდერმა მიხეილ სააკაშვილმა censor.net-თან ინტერვიუში უკრაინაში მოსალოდნელ პოლიტიკურ მოვლენებთან დაკავშირებით ისაუბრა. სააკაშვილი დარწმუნებულია, რომ უკრაინაში ვადამდელი საპარლამენტო არჩევნები ჩატარდება, სადაც გამარჯვებას მისი პოლიტიკური ძალა მოიპოვებს:

„მომავალ ვადამდელ საპარლამენტო არჩევნებში გაიმარჯვებს ერთი კონსოლიდირებული ძალა და მე დიდი იმედი მაქვს რომ ეს ჩვენი პოლიტიკური ძალა იქნება. არ იქნება კოალიცია- ადამიანები კოალიციას ხმას არ მისცემენ. უკრაინაში იქნება გარღვევა, ჩვენს პარტიას ასეთი პრინციპი აქვს, ის ვინც პარლამენტში ერთი ვადაზე მეტჯერ იყო ჩვენს რიგებში ვერ იქნება, ვინც ორ ვადაზე მეტჯერ იყო და აღმასრულებელ შტოში მაღალ თანამდებობას იკავებდა- ვერც ის იქნება ჩვენს რიგებში. ჩვენ დეპუტატებისთვის ისეთივე შეზღუდვების შემოტანა გვინდა, როგორც პრეზიდენტთან დაკავშირებითაა. ჩვენ გვინდა საკონსტიტუციო ცვლილება, რომელიც ყველას ვინც ორ ვადაზე მეტჯერ იყო პარლამენტში, აუკრძალავს არჩევნებში ხელახლა მონაწილეობას. ჩვენ მომხრე ვართ რომ წინასაარჩევნო დაპირებების შეუსრულებლობის გამო სისხლის სამართლებრივი პასუხისმგებლობის საკითხი დადგეს, ჩვენ შევამცირებთ სახელმწიფო აპარატს ორჯერ და პირველ რიგში ეს სამხარეო ადმინისტრაციებს შეეხება, საგადასახადო ტვირთის შემცირებას ვაპირებთ 60%-ით“- განაცხადა მიხეილ სააკაშვილმა.

ჟურნალისტის კითხვაზე სჭირდება თუ არა უკრაინას ახალი მაიდანი სააკაშვილმა უპასუხა, რომ პოლიტიკური კლასის არჩევნებით შეცვლის მომხრეა:

„ჩვენ ახლა მწვავე კრიზისი გვაქვს, პოროშენკო მართავს მედიას, მთავრობას, მაგრამ ვერ მართავს ქვეყანას, ქვეყანას ახლა კრიზისი მართავს, ხელისუფლებას კი ამის მუხრუჭი არ გააჩნია და შეიძლება გზიდან გადავიდეს. მაგრამ მე არ ვთვლი, რომ კიდევ ერთი მაიდანია საჭირო. ვფიქრონ, პოლიტიკური კლასის ცვლილება არჩევნებით უნდა მოხდეს და ხელისუფლებაში უნდა მოვიდეს ძალა, რომელიც წესრიგს დაამყარებს. ხელისუფლება რომელიც სტრუქტურულ რეფორმებს პირველ ორ თვეშივე განახორციელებს. საჭიროა ძალაუფლების ხელში აღება და არა ადამიანების მორიგი ჯგუფის მოყვანა, რომლებსაც აქვთ იმის ფული რომ საპარლამენტო სიებში ადგილები იყიდონ. უკრაინა არასოდეს ყოფილა ასე ერთსულოვანი, როგორც ახლა. სახელმწიფოს მშენებლობა მხოლოდ ანთებული თვალების მქონე იდეალისტებს შეუძლიათ და არა „ბარიგებს“ რომლებიც სხვის ჯიბეებში დაძვრებიან."- აღნიშნა სააკაშვილმა.