საქართველოს პარლემენტის საპროცედურო საკითხთა კომიტეტის თავმჯდომარე გიორგი კახიანი აცხადებს, რომ არ შეიძლება პრეზიდენტის არჩევის წესი საყოველთაო იყოს.

როგორც დღეს გამართულ პრესკონფერენციაზე დეპუტატმა განაცხადა, პრეზიდენტის არჩევის წესზე მსჯელობისას ყველაფერი დადის პიროვნებებზე, ხშირად ეს აღიქმება, რომ ხელისუფლების მხრიდან არის მცდელობა მოქმედი პრეზიდენტის უფლებამოსილებების შეზღუდვის, რაც კახიანის მტკიცებით არასწორია.

„პირველ რიგში საკონსტიტიციო კომისიის ფორმატში მომუშავე ჯგუფმა უნდა იმსჯელოს იმაზე, თუ რა სტატუსის, რა უფლებამოსილების მქონე უნდა იყოს პრეზიდენტი. როდესაც ამ საკითხზე იქნება კონსესუსი, ამის შემდეგ შეიძლება იმაზე საუბარი, ასეთი უფლებამოსილების მქონე პრეზიდენტს როგორი ლეგიტიმაცია უნდა ჰქონდეს. რა თქმა უნდა, პირდაპირი წესით არჩეულ პრეზიდენტს აქვს ძალიან მაღალი ლეგიტიმაცია, ეს ლეგიტიმაცია უფრო ნაკლებია, როდესაც არაპირდაპირი წესით ხდება მისი არჩევა, მაგრამ მთლიანობაში ეს უნდა იყოს რელევანტური იმ უფლებამოსილებების, რაც პრეზიდენტს გააჩნია“- აღნიშნა გიორგი კახიანმა.

მისი თქმით, საპარლამენტო რესპუბლიკის ფუნდამენტის გაძლიაერება პრეზიდენტის კომპეტენციის ნაწილში ცვლილებებს გამოიწვწვს.

„ თუ მივდივართ იმ გზით, რომ პრეზიდენტის კომპეტენციური არსენალი გაძლიერდეს, მაშინ შეიძლება ვიფიქროთ იმაზე, რომ დარჩეს ასეთი არჩევის წესი. თუ მივდივართ უფრო იქითკენ, რომ საპარლამენტო რესპუბლიკის ფუნდამენტს ვაძლიერებთ, ამან შეიძლება გამოიწვიოს პრეზიდენტის კომპეტენციის ნაწილში კიდევ რაღაც ცვლილებები, შესაძლოა არც იყოს ასეთი მაღალი ლეგიტიმაციით მისი არჩევის აუცილებლობა”- განაცხადა „ქართული ოცნების“ წევრმა.

დეპუტატის თქმით, პრეზიდენტის ფუნქცია უნდა იყოს პოლიტიკური კრიზისების არსებობის შემთხვევაში ვითარების გამანეიტრალებელი ინსტიტუცია.

„სამწუხაროდ, ამ საკითხზე როდესაც არის მსჯელობა, რატომღაც ყველაფერი დადის პიროვნებებზე. ხშირად ეს აღიქმება, რომ ხელისუფლების მხრიდან არის მცდელობა კონკრეტული, ამ შემთხვევაში მოქმედ პრეზიდენტზეა საუბარი, უფლებამოსილებების შეზღუდვის. ეს არასწორი მიდგომაა, ინსტიტუციებზე უნდა ვისაუბროთ და არა პიროვნებებზე. პიროვნებები უნდა ერგებდნენ ინსტიტუციებს და არა პირიქით”, -აღნიშნა კახიანმა.

დეპუტატის თქმით, პრეზიდენტის არჩევის წესს ცვლილების შემთხვევაში, ეს მოქმედ პრეზიდენტს არ შეეხება.

”ისეც რომ მოხდეს, რომ პრეზიდენტის არაპირდაპირი წესით არჩევნებზე გადავიდეთ, ეს არანაირად არ შეეხება მოქმედ პრეზიდენტს. მას მოქმედი უფლებამოსილების ვადა ჩვეულებრივად ამოეწურება”, - განაცხადა კახიანმა.