აფხაზეთის ავტონომიური რესპუბლიკის ხელისუფლების წარმომადგენლები სოზარ სუბარს შეხვდნენ

პოლიტიკა - 16:41, 31 Jan, 2017

1390

30 იანვარს საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და დევნილთა მინისტრი სოზარ სუბარი აფხაზეთის ლეგიტიმური ხელისუფლების და აფხაზეთის არასამთავრობო სექტორის წარმომადგენლებს შეხვდა. შეხვედრაზე იმსჯელეს დევნილთა მიმართ სახელმწიფო სტრატეგიის განხორციელების სამოქმედო გეგმის თაობაზე.

მინისტრის განმარტებით, დაგეგმილი რეფორმა ითვალისწინებს დევნილთა საცხოვრებელი ფართით დაკმაყოფილების გრძელვადიან პროცესს, სწორედ ამ მიზანს ემსახურება მათ მიერ შეიმუშავებული ”დევნილის შემწეობის რეფორმის მოსამზადებელი დოკუმენტი”, რომლის მიხედვითაც აღნიშნულ საქმეს უნდა მოხმარდეს დევნილთა 45 ლარიანი შემწეობის გაუქმებით დაზოგილი თანხა.

აფხაზეთის ხელისუფლების წარმომადგენლები მინისტრს დაეთანხმნენ, რომ ცხოვრების განვითარების კვალდაკვალ, მიზანშეწონილად მიაჩნიათ რეფორმის გატარება, თუმცა აღნიშნეს, რომ რეფორმა უნდა იყოს გონივრულად გათვლილი თითოეული ნიუანსის გათვალისწინებით.

”ჩვენ დავარწმუნეთ მინისტრი, რომ აფხაზეთიდან დევნილებთან დაკავშირებული ნებისმიერი პრობლემა საჭიროებს ამ პრობლემის პოლიტიკურ ჭრილში განხილვას, იმ მარტივი მიზეზის გამო, რომ ჩვენ პირველ რიგში პოლიტიკური დევნილები ვართ და იმავდროულად სოციალურად დაუცველებიც. არ დაგვიმალავს უარყოფითი პოზიცია (სავსებით არგუმენტირებული) ამ რეფორმასთან დაკავშირებით. კარგი იქნება, თუკი გაითვალისწინებენ ჩვენს კონცეპტუალურ ხედვას, ეს სერიოზულად დაეხმარება მათ დევნილთა განსახლების პრობლემებზე მუშაობაში. მინისტრმა მზადყოფნა გამოთქვა ერთობლივი მუშაობისთვის. ამავე თემაზე ვიცე-პრემიერთანაც გვაქვს დაგეგმილი სამუშაო შეხვედრა.” - აღნიშნა აფხაზეთის უმაღლესი საბჭოს თავმჯდომარემ ელგუჯა გვაზავამ.