პრეზიდენტი მოუწოდებს პარლამენტს აქტიურად ჩაერთოს „გაზპრომთან“ დაკავშირებულ პროცესებში

პოლიტიკა - 14:44, 31 Jan, 2017

1330

პრეზიდენტის პრეს-სპიკერმა ჟურნალისტებისთვის ბრიფინგი გამართა. ეკა მიშველაძემ რამდენიმე საკითხზე გაამახვილა ყურადღება, მათ შორის „გაზპრომთან“ გაფორმებულ ხელშეკრულებაზეც ისაუბრა.

მიშველაძის განცხადებით, პარლამენტის ინტერესში უნდა შედიოდეს კითხვებზე პასუხების მიღება.

"დღეს უკვე, თითქმის, აღარავინ დაობს იმაზე, რომ „გაზპრომთან“ ახალი პირობებით გაფორმებული ხელშეკრულება, ძველზე უარესია, რაზეც ჩვენ განცხადება გავაკეთეთ ორი კვირის წინ და რასაც გარკვეული ვნებათაღელვა მოჰყვა.

პრეზიდენტი 2015 წლიდან მოყოლებული, მუდმივად ამახვილებდა ყურადღებას, რომ ასეთ რთულ მოლაპარაკებებში უნდა მოხდეს სახელმწიფო რესურსის სრული მობილიზაცია, საერთაშორისო პარტნიორების ჩართულობა იმისთვის, რომ ქვეყანა არ დარჩეს ისეთი სერიოზული სტურქტურის პირისპირ, როგორიცაა „გაზპრომი“.

პრეზიდენტის აზრით, ზარალის მინიმალიზაცია შეიძლებოდა, თუმცა, ეს გარკვეული მიზეზების გამო ვერ მოხერხდა.

მიზეზები კი, აუცილებლად დასადგენია. პასუხი უნდა გაეცეს კითხვებს, მათ შორის კი, ყველაზე მთავარს - რატომ მოხდა ამ სტრატეგიულად უმნიშვნელოვანეს სფეროში ქვეყნის პოზიციების შესუსტება.

ამ კითხვებზე პასუხების მიღება ყველაზე მეტად მაკონტროლებელი ფუნქციის მქონე სახელისუფლებო შტოს - საქართველოს პარლამენტის ინტერესებში უნდა იყოს. თუმცა, ჯერ კიდევ ვერ მოვისმინეთ საქართველოს პარლამენტისგან ხედვა - თუ როგორ მოხდება მომავალში მაინც, მსგავს შემთხვევებში, რისკებისა და საფრთხეების თავიდან აცილება.

შესაბამისად, დღესაც კიდევ ერთხელ საქართველოს პრეზიდენტი მოუწოდებს პარლამენტს აქტიურად ჩაერთოს პროცესში, განახორციელოს მისი კონსტიტუციური ვალდებულება და გააძლიეროს საზედამხედველო ფუნქცია"- განაცხადა ეკა მიშველაძემ.