ვის დაქვემდებარებაში უნდა იყოს ე.წ. ფარული მიყურადების გასაღები- მმართველ გუნდს ახალი ინიციატივა აქვს

პოლიტიკა - 19:21, 30 Jan, 2017

1852

ფარული მიყურადების შესახებ კანონის შეცვლაზე მომუშავე ჯგუფი პარლამენტს კანონპროექტს წარუდგენს, რომლის მიხედვით, ე.წ. გასაღები ახალშექმნნილ სსიპ- ში განთავსდება, ხოლო აღნიშნული სსიპ-ის ხელმძღვანელს პრემიერ-მინისტრი დანიშნავს კომისიის წარდგინებით. კომისიაში იქნებიან პარლამენტის წევრები, სახალხო დამცველის აპარატის წარმომადგენელი, უზენაესი სასამართლოს თავმჯდომარის მოადგილე.

საპარლამენტო უმრავლესობის ხელმძღვანელის არჩილ თალაკვაძის თქმით აღნიშნული ცვლილება უზრუნველყოფს იმას, რომ ეროვნული უსაფრთხოების სისტემები არ დაზარალდეს და ამასთანავე ფარულ საგამოძიებო მოქმედებებთან დაკავშირებული რეფორმა მაქსიმალურად იქნება შესაბამისობაში საკონსტიტუციო სასამართლოს გადაწყვეტილებასთან:

„ინიცირებული იქნება ფარული საგამოძიებო მოქმედებების შესახებ კანონთა ახალი პაკეტი. ჩვენ გვექნება სისტემა, რომელიც მაქსიმალურად დაიცავს ჩვენი მოქალაქეების უსაფრთხოებას და ქვეყნის სტაბილურობას. შემუშავებული დებულებები შეძლებისდაგვარად მაქსიმალურად იქნება შესაბამისობაში საკონსტიტუციო სასამართლოს გადაწყვეტილებაში მოცემულ მოთხოვნებთან. მნიშვნელოვანია ის რომ ფარული საგამოძიებო მოქმედებების ფუნქცია გამოიყოფა ცალკე და გადაეცემა საჯარო სამართლის იურიდიულ პირს, რომელსაც თვითონ არ ექნება საგამოძიებო ფუნქციები და საგამოძიებო მიზნებისთვის ამ ინფორმაციის გამოყენების საჭიროება, რაც ასევე იყო ერთერთი მოთხოვნა და არგუმენტები ამ რეფორმის. ძლიერდება კონტროლის და ანგარიშვალდებულებების მექანიზმები, ბუნებრივია აქ იგულისხმება საპარლამენტო ნდობის ჯგუფი, პერსონალური მონაცემების დაცვის ინსპექტორი და სხვა მაკონტროლებელი ორგანოები. ამ სისტემით დაცული იქნება ფარული მიყურადების ფუნქციების განხორციელება ნებისმიერი გარე ჩარევისგან. ეს ცვლილებები ქმნის გარანტიებს რომ მინიმმუმამდე დავიდეს ჩვენი მოქალაქეების პირად ცხოვრებაში ჩარევის რისკები. ეს ცვლილებები არის მომზადებული იმგვარად რომ ეროვნული უსაფრთხოების სისტემები არ დაზარალდეს და არ შესუსტდეს, მითუმეტეს მაშინ როდესაც საქართველო რეგიონის ერთ-ერთი ყველაზე სტაბილური ქვეყნის სტატუსით აკეთებს პოზიციონირებას.“- განაცხადა არჩილ თალაკვაძემ.

ახალი სისტემის შექმნაზე და მის მნიშვნელობაზე ფრაქცია „ქართული ოცნების“ თავმჯდომარემ,მამუკა მდინარაძემაც ისაუბრა. მისი შეფასებით, საკითხზე შექმნილმა საინიციატივო ჯგუფმა ისეთი პროექტი მოამზადა, რომელიც არსებულ გამოწვევებს შესაბამისად პასუხობს.

„საინიციატივო ჯგუფი საქართველოს პარლამენტს განსახილველად წარუდგენს ახალ პროექტს, რომელიც ნამდვილად წინგადადგული ნაბიჯია, გამომდინარე იქიდან, რომ ის პასუხობს სამივე მოთხოვნას, რაც დღის წესრიგში იდგა. ერთი - საკონსტიტუციო სასამართლოს გადაწყვეტილებასთან შესაბამისობაში მოყვანა, მეორე - უსაფრთხოების გარანტიები და მესამე - ეს არის ადამიანის უფლებების უპრეცენდენტოდ დაზღვევის მექანიზმები. ამ პროექტის მიხედვით სასამართლო კონტროლს დამატებული პერსონალური მონაცემების დაცვის ინსპექტორი და ამას კიდევ დამატებული ახალი საჯარო სამართლის იურიდიული პირი, რომლის ხელმძღვანელის არჩევის პროცედურა მაღალ ლეგიტიმაციას მოითხოვს, მართლაც უპრეცედენტო დაცულობის მექანიზმს შექმნის“, - განაცხადა მამუკა მდინარაძემ.

შეგახსენებთ, პარლამეტში მთავრობის, პარლამენტის, პრეზიდენტის და სასამართლო ხელისუფლების წარმომადგენლები არასამთავრობო ორგანიზაციებთან ერთად ფარული საგამოძიებო მოქმედებების შესახებ კანონში შესატანი ცვლილებების შესახებ დახურულ სხდომაზე მსჯელობენ. სხდომაზე იურიდიულ საკითხთა კომიტეტმა წარადგინა კანონპროექტი, რომლის მიხედვით, ე.წ. გასაღები სახელმწიფო უსაფრთხოების სამსახურში შექმნილ სსიპ-ში გადადის. არასამთავრობო ორგანიზაციები მიიჩნევენ, რომ ფარული მიყურადების ე.წ. გასაღები სახელმწიფო უსაფრთხოების სამსახურში შექმნილ სსიპ-ში არ უნდა გადავიდეს.