საქართველოს ვიზიტით ევროკომისიისა და საგარეო ქმედებათა ევროპული სამსახურის წარმომადგენლები ეწვევიან

პოლიტიკა - 17:33, 30 Jan, 2017

1020

2017 წლის 31 იანვარს-2 თებერვალს, საქართველოში დაგეგმილია ევროკომისიის სამეზობლო პოლიტიკისა და გაფართოების შესახებ მოლაპარკებათა საკითხებში გენერალური დირექტორის (DG NEAR) ქრისტიან დანიელსონის და ევროკავშირის საგარეო ქმედებათა სამსახურის, ევროპისა და ცენტრალური აზიის საკითხებში მმართველი დირექტორის, ტომას მეირ ჰარტინგის ვიზიტი. ევროკავშირის წარმომადგენლები შეხვედრებს გამართავენ საქართველოს აღმასრულებელი ხელისუფლების და საკანონმდებლო ორგანოს მაღალი რანგის ოფიციალურ პირებთან.

შეხვედრებისას მხარეები განიხილავენ საქართველო-ევროკავშირის ორმხრივი დღის წესრიგის აქტუალურ საკითხებს და თანამშრომლობის სამომავლო პერსპექტივებს. მათ შორის, საუბარი შეეხება 2017-2020 წლის ასოცირების ახალ დღის წესრიგსა და დახმარების ერთიან ჩარჩო დოკუმენტს, რომლებზეც ამჟამად მიმდინარეობს აქტიური მუშაობა; სავიზო რეჟიმის ლიბერალიზაციის დასკვნითი პროცედურების დროულად დასრულებას; „აღმოსავლეთ პარტნიორობის“ რიგით მეხუთე სამიტისთვის მზადებას და ა.შ.. შეხვედრებზე საუბარი ასევე შეეხრბა საქაეთვრლოს ოკუპირებულ ტერიტორიებზე არსებულ ვითარებასა და ევროკავშირის ჩართულობას ქვეყანაში სტაბილურობის ხელშეწყობის პროცესში.

ვიზიტის ფარგლებში, ასევე დაგეგმილია ევროკომისიის წარმომადგენლების მიერ ქ. მცხეთაში ევროკავშირის მონიტორინგის მისიის საველე ოფისისა და საოკუპაციო ხაზის მონახულება.