"ცვლილებები არ იქნება ლეგიტიმური" - ხარატიშვილი კონსტიტუციის შესაძლო ცვლილებაზე საუბრობს

პოლიტიკა - 13:59, 30 Jan, 2017

624

საზოგადოებრივი მოძრაობა „ახალი ერთობა საქართველოსთვის“ წევრის, ზურაბ ხარატიშვილის განცხადებით, ევროპის საბჭოს საპარლამენტო ასამბლეაში ვიზიტისას "ქართული ოცნების" მიერ დაგეგმილ საკონსტიტუციო ცვლილებებზე გამახვილდა ყურადღება.

ხარატიშვილის განცხადებით, მოქმედი ხელისუფლება კონსტიტუციას ისე ცვლის, რომ მისთვის ამის მანდატი მოსახლეობას არ მიუცია.

"ქართულ ოცნებას კონსტიტუციაში შეაქვს ის ცვლილებები, რომელზეც ბოლო არჩევნებში ხალხისგან მანდატი არ მიუღია. შესაბამისად, ცვლილებები არ იქნება ლეგიტიმური. ეს არამარტო ჩვენი, არამედ იმ პოლიტიკური ძალების მოსაზრებაცაა, რომლებთანაც ჩვენ შეხვედრები გვქონდა. ჩვენ სხვადასხვა ფრაქციების წარმომადგენლებთან და სამდივნოს წარმომადგენლებთან გვქონდა შეხვედრა. კონსტიტუციაში დაგეგმილი ცვლილებები იყო ერთ-ერთი ძირითადი საკითხი ევროსაბჭოში შეხვედრისას"- აღნიშნა ხარატიშვილმა.

მისივე თქმით, ევროპის საბჭოს საპარლამენტო ასამბლეაში გამართული შეხვედრებისას საუბარი იყო საარჩევნო სისტემის ცვლილებაზე.

"შეხვედრებზე საარჩევნო სისტემაზე ვისაუბრეთ, რა თქმა უნდა, ეს არის არჩევნების პროპორციული სისტემით ჩატარება, ის კონსენსუსი, რომელიც არსებობს მთელ ოპოზიციურ სპექტრში, რომელიც არსებობს საზოგადოებაში და ჩვენ ვფიქრობთ, რომ პოლიტიკური მეთოდებით კვლავ გავაგრძელებთ ხელისუფლებაზე ზეწოლას იმისთვის, რომ არსებული საარჩევნო სისტემა შეიცვალოს"- განმარტა ხარატიშვილმა.