"ევროპული საქართველო" პრეზენტაციისთვის ემზადება - რა გეგმები აქვთ ყოფილ ნაციონალებს

პოლიტიკა - 13:12, 30 Jan, 2017

2432

„ევროპული საქართველო“ პრეზენტაციისთვის ემზადება. პარტია დღეს დაფუძნებისა და სამომავლო გეგმების შესახებ განაცხადს გააკეთებს. პარტია ადგილობრივი თვითმართველობის არჩევნებში მონაწილეობას აქტიურად აპირებს და საკუთარი წარმომადგენელი ყველა თვითმმართველ ქალაქში ეყოლება.
პარტიის ღონისძიება სასტუმრო "ასტერიონში", 13:00 საათზე გაიმართება.

„მე დარწმუნებული ვარ რომ ეს იქნება პოლიტიკური მოძრაობა, რომელიც იბრძოლებს საქართველოში უკეთესი მომავლისთვის. რომელსაც აქვს იმის პერსპექტივა, რომ გახდეს მთავარი პოლიტიკური ძალა და აქვს იმის პერსპექტივა რომ ხალხს უკეთესი ცხოვრების ალტერნატივა შესთავაზოს. ამის შეთავაზება არ შეუძლია არც ხელისუფლებას და არც სხვა პოლიტიკურ პარტიას.“- განაცხადა დავით ბაქრაძემ.

გიგი უგულავას განცხადებით პარტიის სახელწოდებაში „ევროპული საქართველო“ იქნება, პარტია მემერჯვენე-ცენტრისტული იდეოლოგიისაა და ის EPP -ის ოჯახში გაერთიანებას აპირებს:

„ევროპული საქართველო სახელწოდებაში იქნება, იმდენად რამდენადაც ეს პარტია უკვე არსებობს, საზოგადოების გარკვეულმა ნაწილმა ეს სახელი უკვე მიიღო. ჩვენ გვქონდა მსჯელობა სახელთან დაკავშირებით, იყო რამდენიმე ვერსია. გვქონდა შეხვედრა ევროპის სახალხო პარტიის წარმომადგენლებთანაც სადაც ჩვენ ვაპირებთ გაწევრიანებას. ჩვენი პარტია არის მემერჯვენე-ცენტრისტული და ეკუთვნის იმ ოჯახს, რომელსაც EPP წარმოადგენს ამიტომ ევროპული საქართველო სახელწოდებაში იქნება“- განაცხადა გიგი უგულავამ.

პარტიის წევრის ოთო კახიძის განცხადებიტ საპარლამენტო უმცირესობაში არსებულ 2 ფრაქციას კიდევ ერთი, რეგიონების ფრაქცია დაემატება:

„თავიდანვე როცა გაყოფა მოხდა და განხორციელდა გადალაგება, აღინიშნა რომ ეს იყო დროებითი გადალაგება და შემდგომში ჩვენ სხვა ფრაქციების შექმნას არ გამოვრიცხავდით, სავარაუდოდ იქნება 3 ფრაქცია, ერთერთი იქნება რეგიონების ფრაქცია“- განაცხადა ოთო კახიძემ.